تۇركياعا قازاقستان ارقىلى قاشقان ەكسترەميستەر ۇستالدى

بۇل تۋرالى تىلشىلەرمەن كەزدەسۋ بارىسىندا ينتەرپولدىڭ قىرعىزستاندىق ءبولىمىنىڭ قىزمەتكەرى تاالايبەك سارىمساقوۆ مالىمدەدى، - دەپ حابارلايدى Tengrinews.kz ءتىلشىسى.

«ءبىزدىڭ ارىپتەستەر وتە جەدەل قيمىلدادى. شابۋىل جاساعاندار ءبىر تاۋلىك ىشىندە تۇركيا-سيريا شەكاراسىنداعى گازيانتەپ قالاسىندا شەكارانى كەسىپ وتپەك بولعان كەزدە ۇستالدى. اۆتوۆوكزالدا ولاردى ينتەرپول قىزمەتكەرلەرى ۇستادى»، - دەدى تاالايبەك سارىمساقوۆ.

جاقىن ارادا تيلەك ۋۋلۋ الىبەك جانە بەيشەناليەۆ ىرىسقۇل بىشكەككە جەتكىزىلىپ، سوتتىڭ الدىندا جاۋاپ بەرەدى.

ەسكە سالا كەتەيىك، قىرعىزستاندا ءدىنتانۋشى قادىر مالىكوۆكە شابۋىل جاساعان ەكسترەميستەر قىلمىس جاساعاننان كەيىن دەرەۋ قازاقستانعا ءوتىپ، تۇركياعا ۇشقان. قىرعىزستاندا ولاردىڭ سىبايلاستارى ۇستالدى. ولاردىڭ تۇرعان جەرىنەن ەكسترەميستىك مازمۇنداعى كىتاپتار، قارۋ-جاراق پەن وق-دارىلەر تابىلدى. قازىر ۇستالعانداردىڭ باسقا دا قىلمىستارعا قاتىسى جانە ىزدەۋ جاريالانعان ەكسترەميستەردىڭ اراسىندا بار-جوعى انىقتالىپ جاتىر.

2015-جىلى 26- قاراشادا بىشكەكتىڭ «اسانباي» ىقشام اۋدانىنداعى «نارودنىي» دۇكەنىنىڭ ماڭىندا ءدىنتانۋشى قادىر مالىكوۆكە شابۋىل جاسالعان بولاتىن. ول بەتى مەن مويىن تۇسىنان بىرنەشە پىشاق جاراقاتىن الدى. مالىكوۆكە وپەراتسيا جاسالدى. قازىر ول ساۋىعىپ كەلە جاتىر. قىرعىزستان ءى ءى م اۋەلى «بۇزاقىلىق» بابى بويىنشا قىلمىستىق ءىس قوزعادى. كەيىن ونى «ادام ولتىرۋگە وقتالۋ» بابىنا وزگەرتتى. قىرعىزستان ءى ءى م بولجامىنشا، شابۋىلدىڭ مالىكوۆتىڭ قىزمەتىنە قاتىسى جوق. تەرگەۋ بارىسىندا قۇقىق قورعاۋ ورگاندارى قىزمەتكەرلەرى ەكسترەميستەردىڭ ىزىنە ءتۇستى. ەسكە سالا كەتەيىك، سوڭعى كەزدەرى قادىر مالىكوۆ دايش تاراپىنان ورتالىق ازياعا كەلەتىن قاۋىپ تۋرالى بىرنەشە رەت ايتقان بولاتىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى