قازاقستان-قىتاي گاز قۇبىرىنىڭ ءۇشىنشى بولىگىن ىسكە قوستى

كومپرەسسورلىق ستانسالار مەن ءۇشىنشى بولىكتى پايدالانۋعا بەرۋ قىتاي مەن قازاقستان اراسىنداعى ەنەرگەتيكالىق سەرىكتەستىك اياسىنداعى حالىقارالىق جوبانى جۇزەگە اسىرۋ اياسىندا اشىلدى.

ەنەرگەتيكالىق نىسان بۇگىن الماتى وبلىسى جامبىل اۋدانىندا سالتاناتتى تۇردە ىسكە قوسىلدى.

«بۇل جوبانىڭ ءۇش بولىگى دە قازاقستان تاريحىنداعى ەڭ ءىرى حالىقارالىق گاز تاسىمالداۋ جوباسى بولىپ وتىر. اتالعان جوبا ەلباسى ايتقان ەلدىڭ ەكسپورتتىق الەۋەتىن ءارتاراپتاندىرۋ، ينتەگراتسيالاۋ ماقساتىن جۇزەگە اسىرۋعا كومەكتەسەدى. «س» بولىگىنىڭ ۇزىندىعى 1303 شاقىرىمعا جەتتى. و ق و، جامبىل، الماتى وبلىستارىنىڭ تۇتىنۋشىلارىنا گاز تاراتاتىن ا جانە ۆ بولىمىمەن قاتار جاتىر»، - دەدى «قازترانس گاز» ا ق باسقارما باسشىسى قايرات شارىپبايەۆ.

ق ر ەنەرگەتيكا ۆيتسە-ءمينيسترى ماعزۇم مىرزاعاليەۆ ءۇش بولىمنەن جىلىنا 55 ميلليارد كۋب كوگىلدىر وتىن وتەتىنىن ايتتى.

«قازاقستان ترانزيت ءۇشىن تۇرىكمەنستان مەن وزبەكستان گازىنىڭ 1000 مەتر كۋبىنان 35 $ كولەمىندە پايدا تاباتىن بولادى. سونداي-اق ءوز گازىمىزدى تاسىمالداۋ ءۇشىن دە جاعداي جاسالدى»، - دەدى ۆيتسە-مينيستر.

گاز قۇبىرىن سالۋعا 14 مىڭ ادام قاتىستى. جەلىلىك ءبولىم، كومپرەسسورلىق ستانسالار، گاز شىعىنىن ەسەپتەۋ تورابىن قوسپاعاندا جوبا قۇنى 1,5 تريلليون تەڭگە بولدى.

«اتالعان گاز قۇبىرى قازاقستان مەن قىتايدىڭ ەنەرگەتيكا سالاسىنداعى ستراتەگيالىق ارىپتەستىكتىڭ بەلگىسى. قازىر قازاقستان ارقىلى كەلەتىن گاز كولەمى قىتاي يمپورتتايتىن كوگىلدىر وتىن كولەمىنىڭ 30 پايىزىن قۇرايدى»، - دەدى «پەترو-چاينا» ۆيتسە-پرەزيدەنتى ليۋي گۋنسيۋن.

ەسكە سالا كەتسەك، قازاقستان-قىتاي گاز قۇبىرى ۇزىندىعى 7,5 مىڭ شاقىرىم بولاتىن «تۇرىكمەنستان-وزبەكستان-قازاقستان-قىتاي» ترانس شەكارالىق گاز قۇبىرىنىڭ ءبىر بولىگى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى