ەلباسى قازاقستاندىقتاردى «تىعىپ» وتىرعان مۇلىكتەرىن زاڭداستىرۋعا شاقىردى
ايتا كەتەيىك، ەلباسىنىڭ بيىلعى جولداۋىنىڭ تاقىرىبى - «قازاقستان جاڭا جاھاندىق ناقتى احۋالدا: ءوسىم، رەفورمالار، دامۋ».
«مۇلىك پەن قارجىنى جەكەشەلەندىرۋ مەرزىمى 2016 - جىلدىڭ 31 - جەلتوقسانىنا دەيىن ۇزارتىلدى. وسىلايشا، مۇلىك پەن اقشانى زاڭدى اينالىمعا ەنگىزۋ ءۇشىن ازاماتتارىمىزعا قوسىمشا ىنتا تۋدىراتىن جاعداي جاسادىق. ونىڭ ۇستىنە، تەرگەۋ بولمايتىنىنا جانە بارلىق مالىمەت قۇپيا ساقتالاتىنىنا كەپىل بەرىلىپ وتىر. پارلامەنت وسىنداي زاڭدى قابىلدادى، مەن وعان قول قويدىم. بۇل قۇجات زاڭدى كۇشىنە ەندى. دەگەنمەن، ۇكىمەتكە جەكەشەلەندىرۋ شارتتارىن تاعى ءبىر رەت اناليزدەن وتكىزىپ، قاجەت بولسا، جەكەشەلەندىرۋگە قاتىساتىندارعا كەپىلدى كۇشەيتىپ، حالىققا جاقسى ءتۇسىندىرۋ جۇمىستارىن جۇرگىزۋدى تاپسىرامىن»، - دەدى مەملەكەت باسشىسى.
وسى رەتتە، ن. نازاربايەۆ «مۇلكى پەن قارجىسىن جەكەشەلەندىرەيىن بە، جوق پا؟» دەپ ويلانىپ جۇرگەن ازاماتتارعا وسى مۇمكىندىكتى پايدالانۋعا كەڭەس بەردى.
«2017 - جىلدىڭ 1 - قاڭتارىنان باستاپ شىعىندار مەن كىرىستەردى جالپىعا ورتاق دەكلاراتسيالاۋ كۇشىنە ەنەدى. سودان كەيىن، الەمنىڭ قاي بۇرىشىندا ورنالاسسا دا، اكتيۆتەر پەن ەسەپشوتتاردى اشكەرەلەي باستايمىز. سول شەتەلدىك شوتتارداعى اقشا مەن شەتەلدەگى مۇلىكتىڭ قايدان شىققانىن، قاي اقشاعا الىنىپ، قانشا سالىق تولەگەنىن تۇگەل تەكسەرەمىز. مەن بۇنى «تىعىپ» وتىرعان اقشالارىڭىزعا قازاقستان رەسپۋبليكاسى مۇقتاج بولىپ وتىرعاندىقتان ەمەس، ءوز ازاماتتارىمىزدىڭ ۇستىنەن قىلمىستىق ءىس قوزعاپ، ولاردى الەمنىڭ تۇپكىر- تۇپكىرىندە تىعىلىپ جۇرگەن ازاماتتار سياقتى، «بوسقىندارعا» اينالدىرعىمىز كەلمەيتىندىكتەن ايتىپ وتىرمىن. ارينە، ەڭ ءبىرىنشى جيناقتىڭ دۇرىس بولماۋى مۇمكىن، ءبىراق، مەملەكەت شەتەلدەگى اقشالارىڭىزدى قازاقستانعا اكەلىپ، جەكەشەلەندىرۋگە قاتىسىپ، اكتيۆتەرىڭىزدى زاڭداستىرۋعا مۇمكىندىك بەرىپ وتىر. سوندا، تىنىش ءومىر ءسۇرىپ، تىنىش ۇيىقتاي الاسىزدار. مەنىڭ ايتپاعىم - وسى»، - دەدى ەلباسى ن. نازاربايەۆ.
اۆتور: كەنجەكەي توقتامۇرات قىزى
