ماجارستاندا اباي وقۋلارى ءوتتى
اتالمىش ءىس-شارا قازاقستان رەسپۋبليكاسىنىڭ ماجارستانداعى ەلشىلىگىنىڭ قولداۋىمەن جانە اتالعان ج و و- نىڭ فيلولوگيا فاكۋلتەتىنىڭ التايستيكا كافەدراسىمەن بىرلەسە وتىرىپ ۇيىمداستىرىلدى.
وقۋلارعا قاتىسقان ميحاي سايبەي فيلولوگيا فاكۋلتەتىنىڭ دەكانى ءوز كىرىسپە سوزىندە اتالمىش ءىس-شارانىڭ ماڭىزدىلىعىن جانە ونىڭ ارقاسىندا ماجار قاۋىمى ابايدىڭ شىعارماشىلىعىمەن تانىسۋعا مۇمكىندىك العانىن اتاپ ءوتتى.
يشتۆان زيموني - التايستيكا كافەدراسىنىڭ مەڭگەرۋشىسى. ول تۇركولوگيا ەۋروپالىق عىلىم ديستسيپليناسى رەتىندە ەڭ ءبىرىنشى رەت ماجارستاندا پايدا بولعانىنا وراي، ۋنيۆەرسيتەتتە قازاق ءتىلى مەن ادەبيەتىنە ۇلكەن ءمان بەرىلەتىنىن اتاپ ءوتتى.
اباي تۋرالى دايىندالعان ارنايى بايانداماسىن قازاق ءتىلى جانە قازاق ادەبيەتى مۇعالىمى راۋشانگۇل مۇقىشيەۆا وقىدى. قازاق ءتىلى مەن ادەبيەتىن وقىپ جۇرگەن ماجار ستۋدەنتتەرى اقىننىڭ «قارا سوزدەرىن»، «مەن ءبىر جۇمباق اداممىن، ونى دا ويلا» سياقتى ولەڭدەرى مەن پوەمالارىن ماجار تىلىندە وقىدى.
سونداي-اق، ءىس-شارادا فەرەنتس ليست مۋزىكا اكادەمياسىنىڭ ستۋدەنتى ايىمگۇل ورىنبايەۆانىڭ ورىندالۋىندا ابايدىڭ مۋزىكالىق شىعارمالارى دا كورەرمەندەرگە تانىستىرىلدى.
ەۋروپاداعى ەڭ ءىرى بولىپ تابىلاتىن ۋنيۆەرسيتەتتىڭ كىتاپحاناسىندا ابايدىڭ شىعارمالارى مەن قازاق ادەبيەتى تۋرالى عىلىمي زەرتتەۋلەر كورمەسى ۇيىمداستىرىلدى.
سەگەد قالاسىنىڭ ۋنيۆەرسيتەتى 1998-جىلدان بەرى رەسمي تۇردە قازاق ءتىلى مەن ادەبيەتىن وقىتاتىن ورتالىق جانە شىعىس ەۋروپانىڭ جوعارى وقۋ ورىندارىنىڭ ءبىرى بولىپ تابىلادى.
بۋداپەشت شاحارىنىڭ ەڭ كورنەكتى ورتالىق ساياباعىندا ورنالاسقان استانا كوشەسىندە اباي قۇنانباي ۇلىنىڭ ءمۇسىنى ورناتىلعانىن اتاپ ءوتۋ ءجون.
