تەڭگەنىڭ اينالاسىنداعى احۋال قالاي شەشىلەتىندىگىن ۇلتتىق بانك حالىققا ساۋاتتى جەتكىزۋى ءتيىس - ۇلتتىق بانكتىڭ العاشقى ءتوراعاسى

ونىڭ ايتۋىنشا، تەڭگەگە دەگەن حالىقتىڭ سەنىمىن قايتا جانداندىرۋ ءۇشىن ۇلتتىق بانككە الدىمەن اشىق ساياساتتى جۇرگىزە باستاۋ قاجەت.

«ۇكىمەت پەن ۇلتتىق بانك قالىپتاسقان جاعدايدان قازاقستان قالاي شەشىمىن تاباتىندىعىن ساۋاتتى ءتۇسىندىرۋى قاجەت. مىسالى، تەڭگە باعامى تۇراقتاپ قالۋى ءۇشىن ەكونوميكادا وڭ وزگەرىستەر ورىن الۋى ءتيىس. ولار قازىر قولعا الىنىپ تا جاتىر. ءبىزدىڭ ەلدە پرەزيدەنتتىڭ باستاماسىمەن ءبىرقاتار جاقسى-جاقسى باعدارلامالار جۇزەگە اسىرىلۋدا. ولاردىڭ ىشىنەن ۇدەمەلى يندۋستريالىق-يننوۆاتسيالىق دامۋ باعدارلاماسىنىڭ ەكىنشى بەسجىلدىعى مەن «نۇرلى جولدى» ەرەكشە اتاپ وتۋگە بولادى. «نۇرلى جول» باعدارلاماسىنىڭ ءوزى قانشا يگى جەتىستىكتەر بەرەتىنىن ەستىدىڭىزدەر.

قازىرگى ۋاقىتتا ونىڭ اياسىندا 100 مىڭنان استام جاڭا جۇمىس ورنى اشىلدى. كەلەسى جىلى باعدارلاما تاعى كەڭەيەدى دەپ بولجانۋدا. جول ماگيسترالدەرىندە جاڭا ينفراقۇرىلىمدار، ەلدى مەكەندەر، شاعىن جانە ورتا بيزنەس پايدا بولادى. بۇل ءسوزسىز، ەكونوميكانى جانداندىرا تۇسەدى، ول ءوز كەزەگىندە تەڭگەنىڭ تۇراقتانۋىنا زور ىقپالىن جاسايدى»، - دەپ اتاپ ءوتتى ول.

ونىڭ ايتۋىنشا، «نۇرلى جول» سىندى باعدارلامالار اياسىندا ينفلياتسيادان قورىقپاي، ەكونوميكاعا كوبىرەك قاراجات قۇيۋ قاجەت. سونىڭ ارقاسىندا ەكونوميكا دامىپ قانا قويماي، تەڭگە نىعايادى.

«ينفلياتسيانىڭ دەندەپ كەتپەۋى ءۇشىن نارىقتا قولما-قول اقشانى ازايتىپ، ەسەپ ايىرىسۋدا ەلەكتروندى تولەم كارتوچكالارىنىڭ ۇلەسىن ارتتىرۋ قاجەت»، - دەپ ەسەپتەيدى ول.

ايتا كەتەيىك، ق ر پرەزيدەنتى نۇرسۇلتان نازاربايەۆ ق ر ۇلتتىق بانك ءتوراعاسى دانيار اقىشيەۆكە حالىقتىڭ تەڭگەگە دەگەن سەنىمىن ارتتىرۋدى تاپسىرعان بولاتىن.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى