الماتىدا باتىرحان شۇكەنوۆتىڭ «امانات» البومىنىڭ تۇساۋى كەسىلدى - فوتو
«بۇل البومدى كەزىندە باتىر ءوزى شىعارامىن دەپ ازىرلەنىپ جۇرگەن ەدى. كەي اندەر بۇرىن جازىلىپ قويعان. كەي اندەر سوڭعى ايلاردا جازىلىپ جاتىر ەدى. البوم قۇلاققا كىرىپ بويدى الاتىن اندەردەن تۇرادى. ەڭ ءبىر ۇزدىك اندەر جيناقتالعان. تىڭداۋدان جالىققان ەمەسپىن. سىزدەرگە «امانات» ۇنايدى دەگەن ۇمىتتەمىن. وسى ەڭبەكتى شىعارۋعا كومەكتەسكەن ادامدارعا ۇلكەن العىسىمدى ايتامىن»، - دەدى باتىرحان شۇكەنوۆ اتىنداعى قوردىڭ ديرەكتورى ولجاس بايقانوۆ.
البومعا قۋات شىلدەبايەۆ، ەركەن ىنتىقبايەۆ، رينات عايسين، تولەگەن مۇحامەدجانوۆ، ءشامشى قالداياقوۆتىڭ 10 كومپوزيتسياسى كىرگەن.
ءانشىنىڭ دوسى كەلەر جىلى ويعا العان جوسپارلارىمەن ءبولىستى.
2016-جىلدىڭ كوكتەمىندە ۇلكەن مادەنيەت ورتالىعىنىڭ قۇرىلىسى باستالادى. ول ءۇشىن قاجەتتى جەر تەلىمى ءبولىندى.
«كەشەندە دىبىس رەجيسسۋراسىنىڭ ۇلتتىق مەكتەبى اشىلادى. باتىر سونى ارمانداعان. اۋديو، ۆيدەو، فوتو ستۋديا اشىلادى. ورتالىقتا مۋزەي مەن ەسكەرتكىش قويىلادى»، - دەدى و. بايقانوۆ.
سونداي-اق الماتى اكىمدىگىنىڭ قولداۋىمەن تاعى ءۇش ستۋديالىق البوم جارىق كورەدى. ءانشىنىڭ ءومىرى مەن شىعارماشىلىعى تۋرالى دەرەكتى فيلم تۇسىرىلەدى.
8- جەلتوقساندا باتىرحان شۇكەنوۆتى ەسكە الۋعا ارنالعان كەش وتەدى. وعان قازاقستاندىق جانە رەسەيلىك ونەر جۇلدىزدارى قاتىسادى. وندا باتىر اندەرىن ۇزدىك ورىنداۋشىلار اسەل قارسىبايەۆا مەن ءانۋار مامىروۆ ساحنادا دۋەت بولىپ ءان شىرقايدى. ولاردىڭ قانداي ءان ورىندايتىنى ازىرگە قۇپيا.
