الداعى ۋاقىتتا قازاقستاندىق ەكى سپۋتنيك ۇشىرىلادى
بۇل تۋرالى بۇگىن استانادا وتكەن «قازاقستانداعى عارىش كۇنى-2015» اتتى حالىقارالىق سەميناردا ءمالىم بولدى. «وسى ءىس ءساتتى جۇزەگە اسسا، ەلىمىزدە وربيتالىق اپپاراتتار قۇراستىرىلاتىن بولادى» دەلىنگەن جاۋاپتى سالا تاراتقان مالىمەتتە.
قازىرگى تاڭدا ەلىمىزدىڭ عارىشتاعى 4 سپۋتنيگى استاناداعى باقىلاۋ ورتالىعى ارقىلى باسقارىلادى. سولاردىڭ ەكەۋى تەلەكوممۋنيكاتسيالىق، ال قالعانى جەردى قاشىقتىقتان زوندتاۋ باعىتىندا جۇمىس ىستەيدى. ەستەرىڭىزگە سالا كەتەيىك،
بىلتىر KazEOSat-1 جانە KazEOSat-2 دەپ اتالاتىن قوس عارىش قوندىرعىسى ىسكە قوسىلدى. سونىڭ ارقاسىندا اۋىل شارۋاشىلىعى توتەنشە جاعداي، تاۋ-كەن ونەركاسىبى سىندى سالالار جۇمىسىن عارىشتان باقىلاۋعا جول اشىلدى. وسى ىسكە جاۋاپتى «قازاقستان عارىش ساپارى» اكسيونەرلىك قوعامى مەملەكەتتىك ورگاندار مەن شەتەلدەگى تاپسىرىس بەرۋشىلەرگە دە ءتيىمدى قىزمەت ۇسىنىپ كەلەدى.
ماسەلەن، KazEOSat-1 سپۋتنيگى ىسكە قوسىلعالى بەرى جەردەگى 70 ميلليون شارشى مەتر اۋماق سۋرەتكە تۇسىرىلگەن. ياعني عارىش اپپاراتتارىنا جۇمسالعان شىعىن تولىق وتەلىپ، قوسىمشا تابىس اكەلە باستادى.
بەرىك راحىمجانوۆ، «قازاقستان عارىش ساپارى» ۇ ك» ا ق دەرەكتەردى وڭدەۋ باعىتىنىڭ جەتەكشىسى:
- جەردى قاشىقتىقتان زوندتاۋ جۇيەسى كوكتەمگى سۋ تاسقىنى كەزىندە وتە پايدالى بولدى. جانە ورتالىق قازاقستان، قاراعاندى وبلىستارىنداعى سۋ تاسۋ كەزىندە قاجەتتى دەرەكتى ءوز ۋاقىتىندا جەتكىزىپ وتىردى.
سەمينار بارىسىندا عارىشتى يگەرەتىن وتاندىق ماماندار ماسەلەسى دە قارالدى. بۇگىندە ءتورت مەملەكەتتىك ۋنيۆەرسيتەت وسى باعىتتا ءبىلىم بەرەدى. ولاردىڭ وقۋ باعدارلاماسىنا گەوگرافيالىق اقپاراتتىق جۇيەلەۋ دە قوسىلعان. جالپى ەلىمىزدەگى بايلانىس پەن جەردى قاشىقتىقتان زوندتاۋعا ارنالعان سپۋتنيكتەر جۇمىسىمەن 1 مىڭ 300 دەي مامان اينالىسادى. سولاردىڭ باسىم بولىگىن جەرگىلىكتى جاستار قۇراپ وتىر.
جيىنعا قاتىسقان ينۆەستيتسيالار جانە دامۋ ءمينيسترى اسەت يسەكەشوۆ وسى باعىتتاعى جوبالاردىڭ اياسىن كەڭەيتۋدى ۇسىندى. «بۇگىندە ەلىمىز دۇنيەجۇزى بويىنشا جوعارى تەحنولوگيالى عارىش اپپاراتتارى بار العاشقى وندىققا كىرەدى»، - دەدى سالا جەتەكشىسى.
اسەت يسەكەشوۆ، ق ر ينۆەستيتسيالار جانە دامۋ ءمينيسترى:
- عارىش سالاسى - ەل ەكونوميكاسىنىڭ ماڭىزدى باعىتى. ول بارلىق سالادا ءوز پايداسىن اكەلەدى. سەبەبى عارىش الەمى عانا زەرتتەلىپ قويمايدى. جەردەگى سان مىڭداعان قۇبىلىستاردى، ادامداردىڭ ومىرىنە اسەر ەتەتىن جاعدايلاردى الدىن الا بولجاۋعا مۇمكىندىك بار. سوندىقتان مەملەكەت تاراپىنان ءبىز ماڭىزدى مىندەتتەردى جۇكتەپ وتىرمىز.
www.24.kz
