استانادا قازاقستان مەسەناتتارىنىڭ ءبىرىنشى فورۋمى ءوتتى - فوتو
«بيىل ءبىزدىڭ اسسامبلەيا ءبىرقاتار جالپىۇلتتىق، قايىرىمدىلىق اكسيالارىن وتكىزىپ، ونى ەلىمىزدىڭ ءاربىر تۇرعىنىنا جەتكىزدى. اسسامبلەيا جىلىنداعى «ق ح ا - 20 يگى ءىس!» باستى الەۋمەتتىك اكسياسى اياسىندا 90 مىڭ ادامعا 5 ميلليارد 623 ميلليون تەڭگە كولەمىندە كومەك كورسەتىلدى. وعان قاتىسقان ادامداردىڭ سانى 2 ميلليوننان استى. وسى ورايدا بۇل اكسياعا قاتىسقاندارعا العىسىمدى ايتقىم كەلەدى»، - دەدى ق ر مەملەكەتتىك حاتشىسى گۇلشارا ءابدىقالىقوۆا.
مەملەكەتتىك حاتشى سونىمەن قاتار بۇگىندە قوعام «قايىرىمدىلىق تۋرالى» زاڭىن جۇزەگە اسىرۋعا قولداۋ جاساۋى كەرەكتىگىن، ۇيىمداستىرىلىپ وتىرعان سەزد وسى ماسەلە بويىنشا الەۋمەتتىك كەڭ ديالوگقا باستاۋ بولىپ وتىرعانىن اتاپ ءوتتى.
سەزد بارىسىندا قايىرىمدىلىق سالاسىنداعى ق ح ا بايقاۋلارى مەن جوبالارىنىڭ قورىتىندىسى جاسالدى.
سەزدىڭ ماقساتى - ەلدە قايىرىمدىلىقتىڭ دامۋىنا جاڭا ەكپىن بەرۋ، قايىرىمدىلىقپەن اينالىساتىن بارلىق ۇيىمدار مەن ازاماتتاردىڭ بىرلەسۋىنە جاردەمدەسۋ.
شاراعا 1200 دەن استام ادام قاتىستى. ولاردىڭ ىشىندە قايىرىمدىلىقپەن اينالىساتىن ادامدار، مەسەناتتار، ق ح ا مۇشەلەرى، ۇكىمەتتىك ەمەس ۇيىمداردىڭ، ەتنومادەني، ءدىني بىرلەستىكتەردىڭ، قورلاردىڭ، مەملەكەتتىك ورگانداردىڭ، ۇلتتىق كومپانيالاردىڭ وكىلدەرى، شەتەل مەملەكەتتەرىنىڭ ديپلوماتيالىق ميسسيالارى، سونداي-اق عىلىمي جانە شىعارماشىل زيالى قاۋىم، جاستار، وڭىرلەردەن كەلگەن دەلەگاتسيالار جانە ب ا ق وكىلدەرى بار.
