تەلەارنالارداعى حابارلاردى جۋرناليستەر قاۋىمى وزدەرى جۇرگىزۋى كەرەك - ب. جاقىپ

 بۇل تۋرالى بۇگىن الماتىدا ءال- فارابي اتىنداعى قازاق ۇلتتىق ۋنيۆەرسيتەتىندە وتكەن «ب ا ق ماماندارىن دايارلاۋدىڭ باستاۋلارى جانە جاڭا باعىتتارى» اتتى رەسپۋبليكالىق عىلىمي- تاجىريبەلىك كونفەرەنسيا بارىسىندا فيلولوگيا عىلىمدارىنىڭ دوكتورى، پروفەسسور، جۋرناليست، اقىن باۋىرجان جاقىپ ءمالىم ەتتى.

«جۋرناليستيكا دا شىعارماشىلىق ماماندىق. قازىر زامان تالابىنا ساي بۇل سالادا كوپ وزگەرىستەر ورىن الىپ جاتىر. جاڭا باعىتتار قولعا الىنۋدا. سوندىقتان، ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ وقۋ باعدارلاماسىنا جۋرناليستەر قاۋىمىنا ارنالعان تۇراقتى شەبەرلىك سىنىپتارىن ەنگىزۋ كەرەك دەپ ويلايمىن. ونىڭ ۇستىنە قازىر، ق ر ءبىلىم جانە عىلىم مينيسترلىگى تاراپىنان جوعارى وقۋ ورىندارىنىڭ وقۋ باعدارلامالارىنا ۇلكەن وزگەرىستەر ەنگىزىلەيىن دەپ جاتىر. سوندا بەلگىلى، تاجىريبەلى جۋرناليست ماماندار كەلىپ، جاستار اراسىندا ب ا ق سالاسىنىڭ ءار ءتۇرلى باعىتتارى بويىنشا بىلىكتىلىكتى ارتتىرۋ، دامىتۋ بويىنشا شەبەرلىك سىنىپتارىن جۇرگىزە الار ەدى»، - دەدى ب. جاقىپ.

سونىمەن قاتار، ول تەلەارنالارداعى حابارلاردى جۋرناليستەر قاۋىمى وزدەرى جۇرگىزۋى كەرەكتىگىن العا تارتتى.

 «جالپى، ءاربىر كاسىبي مامان ءوز جۇمىسىن اتقارۋى ءتيىس. جۋرناليستەر تەلەديدارداعى تىزگىندى ءوز قولدارىنا الۋلارى كەرەك. وكىنىشكە قاراي، ازىرگە كوپتەگەن تەلەارنالاردا انشىلەر، ارتىستەر جۇرگىزەتىن جەڭىل كۇلكىگە، جەڭىل ازىلگە قۇرىلعان حابارلار كوبەيىپ كەتتى. بۇل كوڭىلگە كىربىڭ ۇيالاتادى»، - دەدى ب. جاقىپ.  

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى