سەرىك احمەتوۆ تەرگەۋشىلەردىڭ تاققان ايىبىن تۇككە تۇرعىسىز دەپ اتادى
بۇل تۋرالى ك ت ك ارناسى حابارلايدى.
ايىپتاۋلاردىڭ بىردە بىرىمەن كەلىسپەيتىنىن احمەتوۆ اشىق ايتىپ وتىر.
«وسىندا وتىرعان ازاماتتاردىڭ بارلىعىنىڭ كوزى اشىق، كوكىرەگى وياۋ. سولاي بولا تۇرا، تەرگەۋ مالىمەتتەرىنىڭ دايەكسىز ەكەنى وكىنىشتى. ەشكىمدى كىنالاعىم كەلمەيدى. ءبىراق مەنى قارالاعانداردىڭ ىسىنە باعانى اللا بەرسىن»، - دەدى احمەتوۆ.
قاراعاندىنىڭ تەندەرلەرىنە قاتىسقان «ستالتسينك» كومپانياسى ءىنىسى مەن بالاسىنا تيەسىلى بولعانىمەن، مەملەكەت الدىنداعى مىندەتتەمەلەرىن ۇقىپتى اتقاردى دەيدى احمەتوۆ. ەكس-پرەمەر جاقىندارىنا جەر ۇلەستىردى دەگەن ايىپپەن دە، اراب فيرمالارىنا بيۋدجەتتىڭ قارجىسىن اۋداردى دەگەنگە دە كەلىسكەن جوق.
اۋقىمدى جەمقورلىق ءىسى بويىنشا ۇكىمەتتىڭ بۇرىنعى باسشىسىمەن بىرگە 4 ايدان بەرى 21 ادام سوت الدىندا جاۋاپ بەرىپ جاتىر. بارلىعى قاراعاندى وبلىسى بيۋدجەتىنىڭ قىرۋار قارجىسىن قالتاعا باستى دەپ ايىپتالۋدا.
