قاسيەتتى مەككەدەگى تاريحي مەشىت تولىقتاي جاڭارتىلادى
تاريحي مەشىتتى قايتا قالپىنا كەلتىرۋ جوباسى ونىڭ يسلام دىنىندەگى ماڭىزدىلىعىن كوتەرۋ ماقساتىندا قولعا الىنىپ وتىر، دەپ حابارلانعان «نۇر استانا» مەشىتىنىڭ سايتىندا.
اتالمىش مەشىت 628 -جىلى مۇحاممەد پايعامباردىڭ (س. ع. س. ) مەككە مۇشرىكتەرىمەن بەيبىتشىلىككە قول جەتكىزىپ، تاريحتا «حۋدايبيا كەلىسىمى» اتالعان كەلىسىم ورناعان جەردە بوي كوتەرگەن. اۋدان مەككەنىڭ باتىسىندا ورنالاسقان.
ساۋد ارابياسى ۇلتتىق مۇرالار جانە تۋريزم جونىندەگى كوميسسيانىڭ باس ديرەكتورى فەيسال ءال-شاريف مەشىتتى وڭدەۋ جۇمىسىنا وزگە كومپانيالاردان وق بويى وزىق تاجىريبەلى فيرما اتسالىساتىنىن ءمالىم ەتتى.
قۇرىلىس بارىسىندا سوڭعى عىلىمي تەحنولوگيا جانە يننوۆاتسيا جەتىستىكتەرى قولدانىلادى. قۇزىرەتتى كوميسسيا مەن «ءال- تۋرات» مۇرالار قورى بۇگىنگى كۇنگە دەيىن كورولدىك اۋماعىنداعى 21 مەشىتكە قايتا جاڭارتۋ جۇمىستارىن جۇرگىزىپ شىققان.
