بوكستان الەم چەمپيوناتى: تاعى ءبىر قازاقستاندىق ي. دىچكو كۇمىس جۇلدە يەلەندى

قاي جارىستا دا سۋپەرسالماقتىڭ ابىروي- بەدەلى بيىك بولىپ ەسەپتەلەدى. سوندىقتان قوس بوكسشى بارىن سالدى. قازاقستاندىق بوكسشى قانشا تىرىسقانىمەن، تورەشىلەردىڭ ۇشەۋى دە جەڭىستى توني يوكاعا بەردى. ءسويتىپ ي. دىچكو كۇمىس جۇلدەگەر اتانعانىمەن، وليمپيادا جولداماسىنا قول جەتكىزە المادى. بۇل سالماقتا چەمپيونعا عانا ليسەنزيا بەرىلەدى.

 ايتا كەتەيىك، وسىعان دەيىنگى ەكى الەم بىرىنشىلىگىندە ي. دىچكو ءبىر قولا، ءبىر كۇمىس مەدال ەنشىلەگەن ەدى. وعان قوسا لوندون وليمپياداسىنىڭ قولا جۇلدەگەرى دەگەن اتاعى جانە بار. الماتىدا 2013 - جىلى وتكەن الەم چەمپيوناتىندا ازەربايجاندىق ماگومەدراسۋل مەدجيدوۆتان نوكاۋتپەن جەڭىلىپ قالعان يۆان جارتى جىلداي ءۇزىلىس الىپ، رينگكە قايتا شىققان بولاتىن. بۇل - سودان كەيىنگى العاشقى جەڭىلىسى.

 دوحادا بۇدان بۇرىن 69 كەلى سالماقتا دانيار ەلەۋسىنوۆ كۇمىس جۇلدەگە قوسا وليمپيادا جولداماسىن جەڭىپ الدى. سونىمەن، قازاقستاندىقتار ەنشىسىندە بۇل چەمپيوناتتا جالعىز عانا جولداما.

 بۇل بىرىنشىلىكتە ۇزدىك ونەر كورسەتىپ، بۇرىنعى بيىكتەرىنە قايتا ورالعان كۋبالىق بوكسشىلار ءتورت بىردەي التىن مەدالدى جەڭىپ الدى. كوماندالىق ەسەپتە ەكىنشى، ءۇشىنشى ورىندى رەسەي مەن ازەربايجان قۇراماسى ءبولىستى.

قازاقستان قۇراماسىنىڭ باس باپكەرى مىرزاعالي ايتجانوۆ وسى بىرىنشىلىك الدىندا ەكى التىن مەدال، ءتورت وليمپيادا جولداماسىن يەلەنۋدى جوسپارلاپ وتىرمىز، دەپ مالىمدەگەن بولاتىن. وكىنىشكە قاراي، قازاقستاندىقتار بۇل مەجەدەن كورىنە المادى.

ەندىگى بار ءۇمىت - الداعى جىلعى ريو- دە- جانەيرو وليمپياداسىندا.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى