نۇرقاتوۆا: ۇلىمنىڭ ارەكەتى زاڭسىز بولسا، قىزمەتىمنەن كەتۋگە دايىنمىن
بۇل تۋرالى اقتوبەدەن NUR. KZ ءتىلشىسى حابارلايدى.
«27 جاستاعى بالامنىڭ وبلىستىق ءبىلىم باسقارماسىنىڭ ورىنباسارى بولىپ وتىرعانى راس. كەلىنىم دە اكىمشىلىكتە لاۋازىمدى قىزمەتتە. ءبىراق، ولاردىڭ جۇمىسقا ورنالاسۋىنا مەن ارالاسقان ەمەسپىن»، - دەدى نۇرقاتوۆا.
استانادا بولعان «نۇر وتان» كەڭەسىنەن كەيىن باسى داۋعا قالعان اقتوبە وبلىسى اكىمىنىڭ ورىنباسارى سارا نۇرقاتوۆا بۇگىن مالىمدەمە جاسادى. ورىنباساردىڭ جۋرناليستەرمەن كەزدەسۋى اكىمدىك عيماراتىندا ەمەس، «نۇر وتان» پارتياسىنىڭ وبلىستىق فيليالىندا بولدى. جۋرناليستەرمەن بۇرىن - سوڭدى مۇنداي وقىس كەزدەسۋ ۇيىمداستىرىپ كورمەگەن اكىم ورىنباسارى قوبالجىپ تۇرعانىن جاسىرعان جوق.
«مەن ءوزىم استانادا بولعان وقيعادان بەيحابارمىن. «نۇر وتان» پارتياسىنىڭ جيىنىندا مەنىڭ وتباسى مۇشەلەرىمنىڭ اكىمدىكتە جۇمىس جاسايتىندىعى تۋرالى ايتىلعان. ءيا، ول راس، مەنىڭ كىشى ۇلىم ماكسيم وبلىستىق ءبىلىم باسقارماسى باسشىسىنىڭ ورىنباسارى. ءبىراق، ونى ول قىزمەتكە تاعايىنداعان مەن ەمەس. بۇرىن ول جاستارمەن جۇمىس بولىمىندە جاسادى. سول جەردە قازىرگى كەلىنشەگىمەن تانىسىپ، وتباسىن قۇردى. بالامنىڭ نەگىزگى ماماندىعى پەداگوگ. ول باسقارماعا قاراپايىم قىزمەتكەر بولىپ كىردى. كەيىن باسقارما باسشىسىنىڭ ورىنباسارى اتاندى. مەنىڭ بالامنان باسقا ەشبىر مامان ول قىزمەتكە ءوزىن ۇسىنباعان. سوندىقتان، بۇل جەردە مەن زاڭسىز ەشتەڭە كورىپ تۇرعان جوقپىن»، - دەيدى سارا نۇرقاتوۆا.
وبلىس اكىمىنىڭ ورىنباسارى «نۇر وتاننىڭ» تەكسەرىسىنە دايىن. زاڭسىزدىق انىقتالسا، ۋاقىتىندا كورەمىز دەپ وتىر. ورىنباسار وبلىس اكىمىنە ارقا سۇيەيتىنىن دە جاسىرعان جوق.
«بۇل وقيعاعا بايلانىستى وبلىس اكىمىمەن دە سويلەستىم. اكىم قولداۋ تانىتتى. ول كىسىنىڭ بۇل ازاماتتىعىنا ريزامىن. ال، وتباسىمدا بۇل تۋرالى اڭگىمە ءالى بولعان جوق. بالام ءىسساپاردا ءجۇر»، - دەيدى نۇرقاتوۆا.
سارا حانىم وتباسى تۋرالى ايتقان كەزدە ءبىراز تولقىپ كەتتى. ەكى ۇلدىڭ اناسى ەكى كەلىنىن دە قولىندا ۇستاپ وتىرعانىن ايتتى. ءبىرىنشى بالاسى مەن كەلىنى مۇگەدەك. ال ەكىنشى ۇل 30 جاسقا جەتپەي، اناسى اكىمنىڭ ورىنباسارى بولىپ تۇرعان اكىمدىككە لاۋازىمدى قىزمەتكەر اتانىپ ەلدى شۋلاتتى.
نۇرقاتوۆانىڭ ورىنباسارلىق قىزمەتتە قالۋ قالماۋى بيلىك پارتياسىنىڭ تەكسەرىسىنەن كەيىن بەلگىلى بولماق. وتباسى مۇشەلەرىنىڭ اكىمدىكتى جاۋلاپ الۋى زاڭدا قيسىنسىز كورىنبەگەنىمەن، كوپشىلىككە ەتيكالىق تۇرعىدان وعاشتاۋ كورىنەتىنى راس.
ءبىراق، ورىنباسار ءۇشىن قالىپتى جايعا ۇقسايدى. «بالام سول قىزمەتكە لايىق بولسا، نەگە جاساماسقا» دەگەندى ايتتى.
