قازاقتىڭ ۇلى تۇلعالارى بەينەلەنگەن پاتريوتتىق پورترەتتەر پايدا بولدى - فوتو
جوبا اۆتورلارىنىڭ ايتۋىنشا، العاشقى بەس پورترەتكە جازۋشى مۇحتار اۋەزوۆ، عالىم قانىش ساتبايەۆ، باتىر باۋىرجان مومىش ۇلى، سۋرەتشى ءابىلحان قاستەيەۆ پەن كوزى ءتىرى عارىشكەر توقتار اۋباكىروۆتەردىڭ تۇلعالارى تاڭدالعان.
«اباي، مۇحتار اۋەزوۆ، ساكەن سەيفۋللين، مۇستافا شوقاي سياقتى تۇلعالاردىڭ بەينەسىن حالىق جاقسى تانيدى. ءبىراق قازاق حالقىنىڭ وزگە دە تۋما تالانتتارى مەن دارىندارى، مىسالى، اقىن تايىر جاروكوۆتىڭ، اكادەميك قانىش ساتبايەۆتىڭ، بولماسا، ءابىلحان قاستەيەۆتىڭ ءتۇر-الپەتتەرىن حالىق كوپ تانىپ-بىلە بەرمەيدى. ولاردىڭ اتاقتارى بار، حالىق ەسىمدەرىن بىلگەنمەن، بەينەسىن كوپ كورمەيدى. سوندىقتان جوبانىڭ ماقساتى - وسىنداي پورترەتتەر ارقىلى جاستار ءبىلىمدى تۇلعالاردىڭ ەسىمدەرىمەن عانا ەمەس، بەينەلەرىمەن دە تانىسسا»، - دەيدى igraphic.kz ديزاين-بيۋروسىنىڭ ارت-ديرەكتورى ۆلاديمير لۋكاشوۆ.
ىلكى جوبا رەتىندە جازۋشى مۇحتار اۋەزوۆ، عالىم قانىش ساتبايەۆ، باتىر باۋىرجان مومىش ۇلى، سۋرەتشى ءابىلحان قاستەيەۆ پەن كوزى ءتىرى عارىشكەر توقتار اۋباكىروۆتەردىڭ بەينەسى تاڭدالعان ەكەن.
«بۇل سۋرەتتەردىڭ استىنا ءبىز مىندەتتى تۇردە قازاقستاندىقتارعا كۇش-جىگەر بەرەتىن، العا باستايتىن جالىندى سوزدەر جازدىق جانە بولاشاقتا سالعان تۋىندىلاردا دا وسىنداي جازۋلار بولادى»، - دەيدى جوبا جەتەكشىسى باعلان ايداشوۆ.
ونىڭ ايتۋىنشا، بۇل جوبانىڭ باسى عانا. بولاشاقتا قازاقتىڭ وزگە دە يگى جاقسىلارى بەينەلەنگەن پورترەتتەر سالىنىپ، كوللەكتسيا جينالعاندا، وقۋ ورىندارىنا سىيلىق رەتىندە تاراتىلادى دەپ جوسپارلانىپ وتىر.
اۆتور: كەنجەكەي توقتامۇرات قىزى
