الماتىدا ەكىنشى رەت ترامۆاي اپاتقا ۇشىرادى، ارنايى كوميسسيا سەبەبىن انىقتاۋمەن شۇعىلدانىپ جاتىر

بۇل تۋرالى بۇگىن «الماتى ەلەكتروترانس» ج ش س باسپا ءسوز قىزمەتىنەن حابارلادى.

«2017 -جىلى 13 -قازاندا الماتىدا №6- باعىتتا جۇرەتىن ترامۆايدىڭ قاتىسۋىمەن ماقاتايەۆ كوشەسى بويىندا ءىرى جول-كولىك اپاتى ورىن الدى. قازىر وسى جول اپاتىنىڭ سەبەبىن انىقتاۋمەن «الماتى ەلەكتروترانس» ج ش س-ىڭ ارنايى كوميسسياسى مەن الماتى ق. ءى ءى د جول پوليتسياسى باسقارماسىنىڭ قىزمەتكەرلەرى اينالىسۋدا»، - دەلىنگەن حابارلامادا.

ايتا كەتەلىك، ترامۆاي ماقاتايەۆ كوشەسى بويىمەن باتىس باعىتتا كەلە جاتىپ، سەيفۋللين داڭعىلىنىڭ قيىلىسىندا 11 جەڭىل اۆتوكولىكپەن سوقتىعىسادى، ءسويتىپ ودان ءارى باتىس باعىتتا جىلجي وتىرىپ، بايتۇرسىنوۆ كوشەسىنىڭ قيىلىسىندا تاعى ءۇش اۆتوكولىكپەن سوقتىعىسادى. كۋاگەرلەردىڭ ايتۋىنشا، ءبىر ايەل جاراقات العان.

قازىر وسى وقيعا بويىنشا الماتى ق. ءى ءى د سوتقا دەيىنگى تەرگەۋ امالدارىن جۇرگىزۋدە.

ترامۆاي «الماتى ەلەكتروترانس» ج ش س ترامۆاي دەپوسىنا تيەسىلى.

ەستەرىڭىزگە سالا كەتەلىك، ءبىرىنشى رەت ۇستىمىزدەگى جىلى 21- قىركۇيەكتە بولعان جول اپاتىندا ترامۆاي 14 جەڭىل اۆتوكولىككە زاقىم كەلتىرگەن بولاتىن. سوندا جول اپاتى سالدارىنان بەس ادام زارداپ شەكتى. ءبىر ايەل ءالى كۇنگە دەيىن اۋرۋحانادا جان ساقتاۋ بولىمىندە اۋىر حالدە جاتىر.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى