پارلامەنت ءماجىلىسىنىڭ دەپۋتاتى ساكەن جىلقايداروۆ ومىردەن وزدى

ساكەن ەگىنباي ۇلى جىلقايداروۆ 1956 - جىلى الماتى وبلىسى كوكسۋ اۋدانى كۋيبىشيەۆ اتىنداعى ۇجىمشاردا تۋعان.

قازاق پوليتەحنيكالىق ينستيتۋتىن جانە الماتى جوعارى پارتيا مەكتەبىن بىتىرگەن.

ينستيتۋتتى بىتىرگەننەن كەيىن تالدىقوعان قالاسىنداعى اككۋمۋلياتور زاۆودىندا قۇيما سەحىندا شەبەر بولىپ جۇمىس ىستەگەن.

1979-1993 - جىلدارى الماتى قالاسى سوۆەت اۋداندىق كومسومول كوميتەتىنىڭ حاتشىسى، الماتى قالالىق جىلۋەنەرگياسىمەن قامتاماسىز ەتۋ مەكەمەسىنىڭ پارتيا كوميتەتىنىڭ حاتشىسى بولىپ ىستەدى.

1993-1996 - جىلدارى - الماتى قالاسى مەدەۋ اۋدانى اكىمىنىڭ ورىنباسارى بولدى.

1997-1999 - جىلدارى - الماتى وبلىسى تالدىقورعان قالاسى اكىمىنىڭ ءبىرىنشى ورىنباسارى.

1999-2011 - جىلدارى - الماتى وبلىسى تالدىقورعان قالاسى اكىمى.

2011-2012 - جىلدارى - الماتى وبلىسى اكىمىنىڭ ورىنباسارى بولعان.

«قۇرمەت» وردەنىمەن ماراپاتتالعان.

«قازاقستان رەسپۋبليكاسىنىڭ تاۋەلسىزدىگىنە 20 جىل»، «استاناعا 10 جىل»، «تىڭ يگەرۋگە 50 جىل»، «قازاقستان رەسپۋبليكاسىنىڭ كونستيتۋتسياسىنا 10 جىل» مەدالدارىمەن ماراپاتتالعان.

وسىعان وراي، بۇگىن ءماجىلىستىڭ جالپى وتىرىسىندا پالاتا سپيكەرى قابيبوللا جاقىپوۆ دەپۋتاتتار اتىنان مارقۇمنىڭ تۋعان تۋىستارىنا كوڭىل ايتىپ، جيىندى باستاماس بۇرىن ارىپتەستەرى س. جىلقايداروۆتى ءبىر مينۋت ەسكە الدى.

 «كەشە كەشكىسىن سۇم اجال ارامىزدان ارىپتەسىمىز ساكەن ەگىنباي ۇلى جىلقايداروۆتى ماڭگىلىككە الىپ كەتتى. اللانىڭ ىسىنە امال جوق. ساكەن ەگىنباي ۇلىنىڭ جارقىن بەينەسى ءبىزدىڭ ءبارىمىزدىڭ جۇرەگىمىزدە ساقتالاتىنى ءسوزسىز. مارقۇمنىڭ تۋعان- تۋىستارىنا، وتباسىنا ورنى تولماس قايعىسىنا ورتاقتاسىپ كوڭىل ايتامىز»، دەدى سپيكەر قابيبوللا جاقىپوۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى