ءانشى ادەمىگە شەتەلدىكتەر «قۇدا تۇسۋدە» - فوتو
بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە ءانشىنىڭ مۋزىكالىق پروديۋسسەرى رينات عايسين ءمالىم ەتتى.
«ءيا، ۇسىنىستار ءتۇستى. مەنىڭ وزىمە دە سوچيدە بولعانىمدا بايقاۋدىڭ باس جۇلدەسىن العان حورۆاتيا ءانشىسى دامير كەدزە ەۋروپالىق ءبىر البومدى بىرلەسىپ جازۋعا ۇسىنىس جاسادى. سونىمەن قاتار ول ادەمىنىڭ ونەرىنە ءتانتى بولىپ، اعىلشىن تىلىندە بىرلەسىپ ءان جازايىق دەگەن ۇسىنىسىن ءبىلدىردى. قازىر بۇل ماسەلەلەردى ويلاستىرىپ جاتىرمىز. مۇنان بولەك، ماسكەۋگە دە جولىمىز ءتۇسۋى مۇمكىن. ءبىراق، قازىرگى ەڭ باستى ماقساتىمىز - ءوز ەلىمىزدە ادەمىنىڭ جەكە البومىن شىعارۋ»، - دەدى ب ا ق وكىلدەرىنە وراي ر. عايسين.
ادەمى كەلەر جىلدىڭ باسىندا ءوزىنىڭ جەكە البومىن شىعارماق.
«بۇل ءانشىنىڭ سوڭعى بايقاۋى ەمەس. ءبىر جىلداي دەمالىس الاتىن بولامىز، ونى ادەمى ءوزى شەشەدى. جاقىن ارادا ادەمىنىڭ شىعارماشىلىق البومىنا كىرىستىك. ال كەلەر جىلدىڭ باسىندا جەكە البومى جارىق كورەدى»، - دەدى ر. عايسين.
سونىمەن قاتار، ونىڭ اتاپ وتۋىنشە، ادەمىنىڭ ءبىر قازاقشا جانە ءبىر ورىسشا انىنە جاڭا جىلعا دەيىن بەينەكليپ ءتۇسىرۋ ماسەلەسى پىسىقتالۋ ۇستىندە.
«ادەمىنىڭ الداعى ۋاقىتتا مەجەلەپ وتىرعان نەگىزگى جوسپارلارى وسىلار. ال ازىرشە، بايقاۋدان كەيىنگى دەمالىستا»، - دەدى ءانشىنىڭ مۋزىكالىق پروديۋسسەرى.
ايتا كەتەيىك، سوچي قالاسىندا وتكەن حالىقارالىق «جاڭا تولقىن - 2015» بايقاۋىنا قاتىسقان قازاقستاندىق ءانشى ادەمى ەكىنشى ورىندى جەڭىپ العان بولاتىن.
اۆتور: مارلان جيەمباي 
