جۋرناليستەرگە قاستاندىق جاسالعان وقيعالار مەملەكەتتىك ورگاندار تاراپىنان اشىق تەرگەلۋى كەرەك - ساراپشى
«جۋىردا استانادا بولعان توي كورتەجىنە قاتىستى داۋ- دامايدى مىسالعا الايىق، بۇدان وزگە دە مىسالدار تولىپ جاتىر، ايتپاعىم، بۇل وقيعالاردىڭ بارلىعى ازاماتتىق قوعام مەملەكەتتىك ورگانداردىڭ جۇمىسىنا، جاۋاپكەرشىلىگىنە ءتيىمدى ىقپال ەتە الاتىنىن، ءتيىستى ورگانداردىڭ نازارىن ناقتى پروبلەمالارعا اۋدارا الاتىنىن دالەلدەپ وتىر. جانە دە، مەملەكەتتىك ورگاندار دا وسىنداي سيپاتتاعى ءوزارا ءىس- قيمىل ورناتۋعا دايىن ەكەنىن كورسەتتى»، - دەيدى ورتالىق باسشىسى.
ال، قازاقپارات تىلشىسىمەن اڭگىمەسىن جالعاستىرعان ول بىرنەشە كۇن بۇرىن الماتىدا بەلگىسىز بىرەۋ سوققىعا جىققان جۋرناليست- بلوگەر بوتا جۇمانوۆانىڭ ءىسىن ىشكى ىستەر مينيسترلىگىنىڭ ءوزى باقىلاۋعا الاتىنىن ايتتى.
«مەملەكەتتىك ورگاندار وسىنداي فاكتىلەرگە كەلگەندە شۇعىل ارەكەت ەتۋى كەرەك. ارينە، بوتا جۇمانوۆانىڭ ءىسى ءالى تەرگەلىپ جاتىر. مۇمكىن ونى (بوتا جۇمانوۆانى - اگەنتتىك) راسىمەن دە قىزمەتىنە، جازعاندارىنا بولا سوققىعا جىققان شىعار، مۇمكىن، بۇل ءبىر بۇزاقىنىڭ ءىسى شىعار. بۇل ءىس ءى ءى م جەكە باقىلاۋىندا جانە وسىنداي ىستەردىڭ بەتى اشىلىپ، كىنالىلەر جازالانۋى كەرەك»، - دەيدى ۆ. كاليۋجنىي.
«بىزدەگى تاجىريبە زاڭناما مەن كونستيتۋتسيا ينتەرنەتتە ەركىن اقپارات تاراتۋعا مۇمكىندىك بار ەكەنىن كورسەتەدى. مەملەكەتتىك ورگانداردىڭ موينىنا ۇلكەن جاۋاپكەرشىلىك جۇكتەلىپ وتىر، ياعني، مەملەكەتتىك ورگاندار ينتەرنەت جۋرناليستەرىنە جاسالعان قاستاندىقتاردى تەرگەۋدە اشىق بولۋى كەرەك»، - دەيدى ول حالىقارالىق ينتەرنەت- پلاتفورما تۋرالى وتكەن جيىندا.
ايتا كەتەيىك، بۇگىن استانادا «قۇقىقتىق مەديا- ورتالىق» قوعامدىق قورىنىڭ ۇيىمداستىرۋىمەن حالىقارالىق ينتەرنەت- پلاتفورما ءوتتى. پلاتفورماعا قازاقستان، رەسەي، بريتانيا، بەلارۋس، ۋكراينا، گرۋزيا، تاجىكستان جانە قىرعىزستان ەلدەرىنىڭ بەلگىلى ساراپشىلارى قاتىسۋدا.
اۆتور: كەنجەكەي توقتامۇرات قىزى
