قازاقستاندا ءوندىرۋ ءتيىمدى، ۇزاق مەرزىمدى سۇرانىسقا يە ونىمدەردىڭ ءتىزىمى جاسالدى

بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە ەلىمىزدىڭ ەنەرگەتيكا ۆيتسە-ءمينيسترى ماعزۇم مىرزاعاليەۆ ءمالىم ەتتى.

ونىڭ ايتۋىنشا، قازاقستاننىڭ دۇنيەجۇزىلىك ساۋدا ۇيىمىنا كىرۋىنە بايلانىستى تۋىندايتىن ءبىرقاتار تاۋەكەلدەر بار. سوندىقتان ەلىمىز ولاردىڭ الدىن الۋ ءۇشىن بىرلەسكەن كاسىپورىندار قۇرۋ ىسىنە كىرىسىپ كەتكەن.

«ءبىز وسىدان بىرنەشە جىل بۇرىن حالىقارالىق كومپانيالارمەن بىرلەسكەن كاسىپورىن قۇرۋعا باعىتتالعان جۇمىستاردى باستاپ كەتتىك. بۇل شارالار تۋىندايتىن قاۋىپتەردىڭ اسەرىن وتپەلى كەزەڭ بارىسىندا تارتىلاتىن زامانۋي تەحنولوگيالار مەن باسەكەگە قابىلەتتى تاۋارلار جانە قىزمەتتەر شىعارۋ ءوندىرىسىن يگەرۋ ارقاسىندا جەڭىلدەتەدى»، - دەدى ول.

وسى ورايدا ۆيتسە-مينيستر ەلىمىزدە مۇناي-گاز كومپانيالارى ساتىپ الاتىن تاۋارلارعا كۇردەلى ساراپتاما جاسالىپ، قازاقستاندا ءوندىرۋ ءتيىمدى، ۇزاق مەرزىمدى سۇرانىسقا يە جانە جۇمىس ورىندارىن اشۋعا جاعداي جاسايتىن ونىمدەردىڭ ءتىزىمى جاسالعانىن اتاپ ءوتتى. اتالعان تىزىمگە ەلەكتر قۇرالدارى، قۇبىر ونىمدەرى، فيتينگتەر، باقىلاۋشى-ەسەپتەۋشى قۇرالدار سىندى ونىمدەر ەنگەن.

«بۇگىنگى كۇننىڭ وزىندە بۇل باعىتتا وڭ ناتيجە بار. ماسەلەن، «دجەنەرال ەلەكتريك» كومپانياسى ورال قالاسىندا گاز تۋربينالارىن جوندەيتىن ورتالىق اشتى. اقسايدا يندۋستريالدىق پارك ىسكە قوسىلدى. وندا قىزمەتتىڭ 8 ءتۇرى بويىنشا ءوندىرىس جۇمىستارى باستالدى. Tenaris كومپانياسى اقتاۋ قالاسىندا جوعارى سەگمەنتتى بۇراندالى قۇبىر زاۋىتى قۇرىلىسىن باستادى. Invensys كومپانياسى باقىلاۋشى-ولشەۋىش قۇرالداردى ءوندىرۋ جانە جوندەۋ بويىنشا بىرلەسكەن كاسىپورىن قۇردى»، - دەدى م. مىرزاعاليەۆ.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى