الماتىدا زاعيپ جانە ناشار كورەتىن ازاماتتارعا ارنالعان «ءان پاديشاسى - ءشامشى» اتتى ادەبي-سازدى كەش ءوتتى

«زاعيپ جانە ناشار كورەتىن ازاماتتارعا ارنالعان رەسپۋبليكالىق كىتاپحانا» مەملەكەتتىك مەكەمەسىندە وتكەن مادەني شاراعا 50 دەن استام ادام قاتىستى.

«بۇل كەشتىڭ ماقساتى - وسى كىتاپحانانىڭ وقىرماندارىن، ياعني زاعيپ جانە ناشار كورەتىن قامكوڭىل جانداردى قازاقستاننىڭ حالىق ءارتىسى ءشامشى قالداياقوۆتىڭ ءومىرى جانە شىعارماشىلىعىمەن ەتەنە تانىستىرۋ جانە كوڭىلدەرىن كوتەرۋ. سوندىقتان كەش بارىسىندا كىتاپحانا قىزمەتكەرلەرى مەن وقىرماندار قوسىلىپ ءشامشى اندەرىن شىرقايدى»، - دەدى ءوز سوزىندە اتالعان مەكەمەسىنىڭ ونەر جانە سپورت ادەبيەتتەرى ءبولىمىنىڭ جەتەكشىسى مۇباراك شاكىر.

ال كەش بارىسىندا كىتاپحانا قىزمەتكەرلەرى ش. قالداياقوۆ جايىندا قىزىقتى دەرەكتەر كەلتىرىپ، ارنايى باياندامالار وقىدى. ونىڭ اياعى كىشىگىرىم كونسەرتكە ۇلاستى. قۇلاقتارى ناشار ەستىپ، كوزدەرى ناشار كورسە دە ونەر جولىنا قانات قاققان جاندار كومپوزيتوردىڭ «ارىس جاعاسىندا»، «ارمانداستار»، «قاراكوز»، «اق ماڭدايلىم» سەكىلدى اندەرىن ورىندادى. ال كەش سوڭىندا مۇباراك شاكىردىڭ فورتەپيانودا سۇيەمەلدەۋىمەن بۇگىنگى ادەبي كەشكە جينالعان 50 دەن استام ادام «مەنىڭ قازاقستانىم» ءانىن شىرقادى.

سونىمەن قاتار، كىتاپحانادا ش. قالداياقوۆتىڭ ءومىرى مەن شىعارماشىلىعىنا ارنالعان كىتاپتار، البومدار، مۋزىكاسى جازىلعان كۇيتاباقتار، س د ديسكىلەر قويىلعان ارناۋلى كورمە ۇيىمداستىرىلدى.

ايتا كەتەلىك، ءوزىنىڭ 40 جىلدان اساتىن شىعارماشىلىق جولىندا ءشامشى قالداياقوۆ 300 گە جۋىق ءان جازعان ەكەن.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى