وزدەرىڭ بىلەر نارتايمىن رەسپۋبليكالىق ءانشى- جىرشىلار بايقاۋى ءوتتى - فوتو
نارتايداي نار تۇلعانىڭ حالقىنا قالدىرعان مول مۇراسى ەل جادىندا. ونىڭ وزگەشە ونەر تۋىندىلارى قازاق مادەنيەتىنىڭ مايەگىنە اينالىپ وتىر. بايقاۋدىڭ باستى ماقساتى دا نارتايدىڭ ازاماتتىق، ونەرپازدىق بىرەگەي تۇلعاسىن جاس ۇرپاقتىڭ ساناسىندا جاڭعىرتۋ بولدى. سونداي-اق، بۇل بايقاۋ رەسپۋبليكا كولەمىندەگى ءداستۇرلى انشىلەردىڭ تاجىريبە الماسۋىنا، قازاقستانداعى ءداستۇرلى ءان مەكتەپتەرىن ءبىر ارنادا توعىسۋىنا سەبەپ بولدى.
وبلىس اكىمى قىرىمبەك كوشەربايەۆ قازاق ءان ونەرىندە سىرناي ءداستۇرىن قالىپتاستىرۋشى، ءانشى-كومپوزيتور، زامانا بۇلبۇلى نارتاي بەكەجانوۆتىڭ 125 جىلدىعىمەن قۇتتىقتاپ، بايقاۋعا قاتىسۋشىلارعا ساتتىلىك تىلەدى.
- حالقى قادىرلەگەن نارتايدىڭ ونەرى سان ۇرپاق سۋسىنداپ، جاس ونەرپازدار تابىنا باس يەتىن كاۋسار بۇلاق ءتارىزدى. بيىل سول قۇدىرەتتى ونەردىڭ يەسى نارتاي بەكەجانوۆتىڭ 125 جىلدىق مەرەيتويى. تاۋەلسىز ەلدىڭ جاڭا ۇرپاعى نارتاي مۇراسىنا مۇلدە تىڭ تۇرعىدان كەلىپ، ونىڭ كەلەشەك ورىسىنە سونى سەرپىن بەرەتىنىنە ءبىز كامىل سەنەمىز، - دەدى وبلىس اكىمى.
ونەر دوداسىنا ەلىمىزدىڭ ءار وڭىرىنەن 22 ۇمىتكەر قاتىستى. ولار بايقاۋ بارىسىندا ن. بەكەجانوۆتىڭ شىعارماشىلىعىنان ءبىر ءان جانە ءوز ءوڭىرىنىڭ ءداستۇرلى ءان مەكتەبىنىڭ ءبىر ءانىن ورىندادى. بايقاۋعا رامازان تايمانوۆ، شاحماردان ءابىلوۆ، الماس الماتوۆ، قاجىبەك بەكبوسىنوۆ سىندى ءداستۇرلى ءان-جىر مايتالماندارى قازىلىق ەتتى. كونكۋرس قورىتىندىسى بويىنشا نارتاي جىر مەكتەبىنىڭ ءىزىن جالعاستىرۋشى قىزىلوردالىق مۇحامەدالى بەكپەيىسوۆ باس جۇلدەنى قانجىعاسىنا بايلادى. ال اتىراۋلىق اقمارال نوعايبايەۆا -1 -ورىن، استانالىق زۋلفيا بايمىرزايەۆا - 2 -ورىن، قاراعاندىلىق داۋرەنبەك اركەنوۆ 3 -ورىندى يەمدەندى.
