ماقپال ءجۇنىسوۆا: بايتەرەكتىڭ جانىنان وتكەن سايىن ۇيالامىن
- مەندە ايتىلماعان ون شاقتى ءان تۇر. كونسەرتتە رەپەرتۋاردى تۇگەل جاڭارتىپ ايتۋ مۇمكىن ەمەس ءارى شارت تا ەمەس. حالىقتىڭ ءسۇيىپ تىڭدايتىن ءانىن ايتپاي كەتسەڭ، رەنجيدى. «ينستاگرام» پاراقشاسىنا «مەن مىنا جەردەمىن. كەلىڭىزدەر!» - دەسەم، بىردەن انشلاگ بولادى. ال كوستيۋم دەگەن دايىن تۇر، كويلەكتى تىكتىرىپ الىپ جۇرە بەرەمىز. ەندى كونسەرت بەرەتىن بولسام، تەلەارنالارعا تۇسىرتپەي- اق قويايىن دەپ وتىرمىن. ءبارىبىر كورسەتپەيدى عوي.
- شوۋ كونسەرت دەگەندى قالاي تۇسىنەسىز؟
- مەنى بۇرىن تەلەارنالاردان كورسەتىپ جۇرگەندە كونسەرتتەرگە، ارنايى كەشتەرگە شاقىراتىن. سول كەزدە ءسىزدىڭ انىڭىزگە ءبي قويۋ كەرەك دەسە، كەلىسپەيتىنمىن. ايتقان ءانىمنىڭ تابيعاتىنا ول قىزداردىڭ ءبيى مۇلدەم كەلمەيتىن. « ءمان- ماعىناسى تەرەڭ انگە «تىر- جالاڭاش» قىزداردىڭ ءبيى كەرەك ەمەس» دەپ قويدىرتپايتىنمىن. قازىر وسىنى بىرەۋلەر «شوۋ كونسەرت» دەپ ءجۇر عوي. «شوۋ» دەگەن ونداي بولماۋ كەرەك. كەز كەلگەن ءانشىنىڭ كونتسەرتىن قاراساڭىز، سول ءبىر بي توبى، ءتىپتى كيىمدەرىن دە اۋىستىرمايدى. بەلىن، ءتوسىن اشقاندار، شىعىس ءبيى - سونىڭ ءبارىن قازىر شوۋ دەپ ويلايتىن بولدى. ساحنانىڭ بەزەندىرىلۋى، جارىقتى بەرۋدىڭ الۋاندىلىعى ءوز الدىنا. مەنىڭشە، ءانشىنىڭ ءوزى انمەن شوۋ جاساۋ كەرەك. رومانسى بار، بيلەيتىن ءانى بار، دراماسى بار، دومبىراسى بار، سوسىن ءاربىر ءاندى ايتقاندا ءوزىنىڭ بەت- الپەتىمەن شوۋ جاساۋ كەرەك.
- حيت اندەرىڭىز جايلى نە ايتاسىز؟
- حيت اندەرىم كوپ قوي. بيىل فاريزا اپامىزدىڭ «جىلا جۇرەگىمە» ءان جازدىم. حيت بولاتىن ءان، ءبىراق ءالى بەرىلمەي جاتىر. كليپ تۇسىرمەيمىز، ونى ءبارىبىر كورسەتپەيدى. «ادامدار، كەشىرىڭدەر» ءانى ەندى عالامتور ارقىلى تارادى. سارينانىڭ «الەمىم سەنسىڭ ادەمى» دەگەن ءبىر جاقسى ءانى جازىلدى، ءالى عالامتورعا سالىنعان جوق. تەحنيكا جاعىنا جوقپىن. ءانى مەن ءسوزى توقتار سەرىكوۆتىكى، «سەن جانە مەن» زاكەڭ ەكەۋمىزگە ارنالىپ جازىلعان. تاماشا ءبىر تۋىندى. كەلەسى اپتادا «kazmuz» عا سالاتىن شىعارمىز.
- ءسىزدى تەلەديداردان كورسەتپەي قويعاننان ەشنارسە جوعالتپايسىز عوي. كەرىسىنشە حالىقتىڭ سىزگە دەگەن ىقىلاسى تاسىپ تۇر. قازىر انشىلەردىڭ قادىرى ءتۇسىپ كەتكەن زامان. الەۋمەتتىك پاراقشانى اشساڭ دا، تەلەديداردى قوسساڭ دا، تويعا بارا قالساڭ دا ءانشىنى كورەسىڭ. قولجەتىمدى بولىپ كەتتى. «قازىر ءانشى اسپانداعى جۇلدىز دا، جەردەگى قۇندىز دا بولماي قالدى» دەگەنگە نە ايتاسىز؟
- ول دا دۇرىس شىعار. مەن، ءبىر جاعىنان، ءوز دەنساۋلىعىمدى جوعالتىپ جاتىرمىن. قانشاما كەشتەر ءتۇسىرىلدى. ارمان دۇيسەن، اسەت بەيسەۋوۆ، گۇلنار داۋكەنوۆا، مۇقاعاليدىڭ كەشىنە دە باردىق. ءبىراق كەسىپ تاستايدى. بۇل ماعان ەمەس، اسەتكە، مۇقاعاليعا قۇرمەتتىڭ جوقتىعى عوي. ال مەن سونشاما «حالىق جاۋى» ەمەس شىعارمىن. تەلەديداردان كورىنبەي قالساڭ، قازىر حالىق باسقاشا ويلايدى. انا جولى ينستاگرامىمدى دا ءوشىرىپ تاستادىم. ون كۇننەن كەيىن اشىپ قالسام، «قايدا ءجۇرسىز؟ قايدا كەتتىڭىز؟ » دەگەن سۇراقتار وتە كوپ. مەرەيگە وشىرەمىن دەپ ايتسام: «ماما، حالىق نە دەپ ويلايدى؟ تاعى بىرەۋلەر سەنى تۇرمىسقا شىعىپ كەتتى دەپ جازىپ جىبەرەدى» ، - دەيدى (ادەمى كۇلكىسىمەن كۇلىپ الدى) .
- اندەرىڭىزدى عالامتورعا سالۋدا قينالىڭقىرايدى ەكەنسىز. بالكىم، سىزگە پروديۋسەر، كومەكشى قاجەت بولار؟
- زاكەڭ بار كەزدە ءبىر كەلىنشەكتى پروديۋسەر ەتىپ العانبىز. باستان- اياق كيىندىردىك، ءۇي- جايىن جاساپ بەردىك. قىسقاسى، اياعىنان تىك تۇرعىزدىق. جۇمىس ىستەپ تە كوردىك، ءبىراق مەنىڭ تابيعاتىما كەلمەيدى ەكەن. مەن ءوزىم جۇمىستى تياناقتى جاسايمىن. ۋاقىتىندا كەلۋ، ۋاقىتىمەن دايىندىق جاساۋعا ۇيرەنگەنمىن. ءبىر ءىس ۋاقىتىلى ورىندالماسا، كادىمگىدەي جۇيكەم توزادى. نەگىزىنەن، ءاندى ناسيحاتتاۋدى ءوز اۆتورلارىما تابىستايمىن. جاس انشىلەردىڭ پروديۋسەرى بار، ولار زامان تالابىنا سايكەس تەلەارنا، راديوعا بەرەدى، «يۋتۋب» سايتىنا سالادى. «ينستاگرام» الەۋمەتتىك جەلىسىن ەندى ۇيرەنىپ جاتىرمىن.
- الەۋمەتتىك جەلىدەن تەك ينستاگرامدى عانا قولداناسىز. وعان نە سەبەپ؟
- وعان قىزىم مەرەي سەبەپ بولدى. بيىل ءبىر ايعا لوندونعا وقۋعا كەتتى. قىزىمدى ويلاپ، ەشقايدا شىقپاي قويدىم. بارلىق تويلاردان باس تارتىپ، تۋرا قىزىمدى سوعىسقا جىبەرگەندەي ۇيدە وتىرىپ الدىم. كۇندە تاڭەرتەڭ ءارى كەشكە حابارلاسىپ تۇردىم. ول سۋرەت جىبەرەدى، سوعان ءماز بولىپ وتىردىم. زاماننىڭ تالابى عوي، قازىر كادىمگىدەي ۇيرەنىپ الدىم. مەرەيدە «اقىلدى تەلەفون» بار عوي. ال مەندە، ءوزىڭ بىلەسىڭ، مىناداي تەلەفوندار (قولىنداعى بۇرىن شىققان تەلەفوندى كورسەتىپ). ءسويتىپ، قىزىم قويماي ءجۇرىپ ماعان « ءسىز قانشا ايتقانمەن حالىق ءارتىسىسىز عوي» دەپ «ايفوندى» الدىرتتى. ءوزىڭىز بىلەسىز، «سەنسور» ولاي جۇگىرىپ، بىلاي جۇگىرىپ، قانىمدى ابدەن ءىشتى. تەلەفونىنىڭ ەكرانىن ىزدەپ شارشادىم. ەندى ورنىندا تۇرمايدى عوي (كۇلىپ الدى).
- جىل سايىن بىزدە «استانا جۇلدىزى» ، «مۋززوۋن» ارنالارىنىڭ جەڭىمپاز انشىلەردى انىقتايتىن بايقاۋى بولادى. جۇلدىزداردى انىقتايتىن ءجۇز ساراپشىنىڭ ىشىنەن ءسىزدى كورمەيمىز. نەگە؟
- مەنى ونداي جەرلەرگە مۇلدەم شاقىرمايدى. ماعان ءۇش- ءتورت كۇن قالعاندا «استانا جۇلدىزىنا» شاقىرۋ ءۇشىن ءبىر قىز قوڭىراۋ سوعىپ، قىزىل كىلەمنىڭ ۇستىنەن وتۋگە ءوتىنىش جاسادى. «جاقسى، قىزىل كىلەمنەن وتەيىك، ول جەردە ءان سالامىز با؟ »، « ءبىر اتاق- داڭق بەرەيىن دەپ جاتقان جوقسىز با؟» - دەپ ادەيى سۇرادىم. «جوق، ونداي ەشنارسە بولمايدى»، - دەدى. باسقا جوسپارلارىم بولعاندىقتان، الدىن الا بارا المايتىنىمدى ايتتىم. «جۇلدىز» الۋعا دامەم جوق. «جۇلدىزداردىڭ» بارلىعىن الىپ قويعانمىن. ساراپشى رەتىندە شاقىرماي وتىر، مويىندايمىن. ادامنىڭ وزىندىك ورنى، باعاسى بولۋ كەرەك. جالپى بۇگىنگە دەيىن «گاككۋ» ارناسىنىڭ باسشىسى عانا قوڭىراۋ شالىپ، رەترو- اندەرىمدى سۇرادى. «گاككۋ» ارناسىنان بەرمەك ويلارى بار ەكەن. مەن كادىمگىدەي قۋانىپ قالدىم.
وتكەندە ءبىر قىز تاعى قوڭىراۋ شالىپ: «ماقپال اپاي، ءسىزدى كەشكە كونسەرتكە شاقىرايىق دەپ ەدىك، سوعان سىزگە شاقىرۋ بيلەتىن اپارىپ بەرسەك بولا ما؟ » - دەيدى. تۇسكى ساعات 13:00, ال كونسەرت كەشكى 19:00-دە. «مەنىڭ كەشكە جوسپارلارىم بار، ون كۇن بۇرىن حابارلاسۋعا بولادى عوي» ، - دەپ ەدىم، الگى قىز ىڭعايسىزدانىپ قالدى. سوندا كونسەرت بەرەتىن ءانشى قىزدىڭ ءوزى حابارلاسىپ شاقىرسا بولمايتىن با ەدى؟ زاكەڭ الماتى وبلىسىنىڭ اكىمى بولىپ تۇرعاندا سول قىزدى ەڭ العاش ساحناعا شىعارعان قازىرگى پروديۋسەرى ەمەس، مەن ەدىم. ارينە، ادامنىڭ كوڭىلىنە كەلەدى. سول سەكىلدى ءتۇرلى شارالاردىڭ باسى- قاسىندا ءبىزدىڭ انشىلەر جۇرەدى عوي. سول كەزدە نەگە «ماقپال اپامىز جوق، نەگە شاقىرمايسىز؟ نەگە شىقپاي جاتىر؟ » دەپ ايتپايدى؟ انشىلەردىڭ اراسىندا ۇيىمشىلدىق جوق. ال سول انشىلەر «ماقپال اپا، مەن ۇيلەنەيىن دەپ جاتىرمىن» ، «تۇرمىسقا شىعايىن دەپ جاتىرمىن» دەپ بارلىعى تويلارىنا شاقىرادى. سىيلىعىنان قاشپايىن، ۇيات بولماسىن دەپ بارامىن. سول انشىلەر «ءبىز جاڭا جىلعا» ءتۇسىپ جاتىرمىز، ءسىز نەگە شىقپادىڭىز؟» - دەپ تە سۇرامايدى عوي. ارينە، ولاردىڭ قولدارىنان ەشنارسە كەلمەيدى. باستىسى - كوڭىل اۋلاۋ عوي. بيلىكتىڭ تاراپىنان با، الدە تەلەارنا باسشىلارىنىڭ تاراپىنان با، ايتەۋىر مەنى شىعارماي جاتقان ادامنىڭ كىم ەكەنى بەلگىسىز.
- ول ادامنىڭ كىم ەكەنىن شامامەن باعامداي المايسىز با؟
- مەنى ساحناعا شىعارماي جۇرگەن ادامدى ناقتى بىلمەيمىن. بيلىكتە جۇرگەن ءبىر كىسىلەر «ءسىز ءبىر كىسىنىڭ تويىنا بارماي قالىپسىز عوي، سول ءۇشىن كەدەرگى جاساپ جاتىر» دەيدى.
- سول ءۇشىن بە؟
- ءيا، «ەندى ايتىپ كورسىن ءانىن» دەپ ايتاتىن كورىنەدى. قىزىق. كوبىنە اتقوسشىلارىن جىبەرەدى. كىم ەكەنىن قايدان بىلەسىڭ؟ ! سوسىن ادامدار بايىعان سايىن ساراڭ بولىپ كەتەدى عوي. گونورارىڭدى ايتساڭ، «ويباي، تەگىن كەلەدى دەپ وتىرساق، اقشا سۇراعانىڭىز نە؟ !» دەيتىندەرى بار. سوندايلارعا قىرسىعىپ قالامىن. «كەشىرىڭىز، قۇستار عانا تەگىن سايرايدى» ، - دەيمىن. نەگىزى كوپ كىسىنىڭ تويىنا بارماي قالعانمىن. بۇنىڭ زيانى تيەدى دەپ ەشقاشان ويلاماپپىن.
- ونەرگە جاڭا قادام باسقان جاس انشىلەردىڭ جەتىسپەي جاتقان تۇستارىن، كەمشىلىكتەرىن اشىق ايتقان كەزدەرىڭىزدى كورمەپپىز. جاس انشىلەرمەن «كونفليكتكە» تۇسكىڭىز كەلمەي مە؟
- نە ءۇشىن سىنايمىن؟ ءبىزدىڭ ەسترادادا جاستار وتە كوپ. ولاردىڭ بارلىق اندەرى حيت، بارلىق اندەرى كەرەمەت دەپ ايتا المايمىن، ارينە. سىيعا تارتقان البومى ىشىنەن ەكى- ءۇش ءانىن عانا تىڭدايسىڭ. حالىق تا سولاي ىستەيدى. ءيا، بىرەۋدىڭ كوڭىلى ءۇشىن ايتادى، دوسىنىڭ جازعانىن ايتادى. مەن ارنايى ب ا ق الدىندا ولاردى سىناماسام دا، جەكە كەزدەسكەندە ءوز اقىلىمدى ايتىپ، ءاردايىم كەڭەسىمدى بەرەمىن. مەنىڭشە، جۇرت الدىندا بىرەۋدىڭ ماسقاراسىن شىعارعانشا، وسى ءبىر ءىسىم دۇرىس سەكىلدى.
- بىزدە قازىر ءوزىڭىز سەكىلدى حالىق ءارتىستەرىنىڭ بالالارى دا ءانشى عوي. ال ءسىز مەرەيدىڭ ءانشى بولعانىن قالامايدى ەكەنسىز. نەگە؟
- جوق. بۇل مەنىڭ ەمەس، بالانىڭ قالاۋى. «مەرەي، سەن مەنەن وزىپ، ءانشى بولىپ كەتەيىن دەپ تۇرسىڭ عوي» دەيمىن كەيدە. «جوق، ماما، بۇل حوببي» دەيدى. مەرەي ءوزىنىڭ ءانشى بولعىسى كەلمەيتىنىن، وتە قيىن جول ەكەنىن اشىق ايتادى. وعان ونىڭ اقىلى جەتەدى.
- جالپى، ءسىزدىڭ ونەر جولىڭىزداعى كەيبىر ساتسىزدىكتەرىڭىز مەرەيگە كەرى اسەر ەتتى دەپ ويلامايسىز با؟
- جوق. مەن قينالىپ تۇرسام دا، مۇڭايىپ تۇرسام دا مەرەيگە كورسەتپەۋگە تىرىسامىن. الماتىدا سىڭىلىلەرىم تۇرادى، مەرەيدى سولارعا تابىستايمىن. كينوعا اپارۋلارىن، قىدىرتۋلارىن سۇرايمىن. ءبىراق سىرتتان ايتىلاتىن سوزدەردى مەرەيگە ادەيى جەتكىزەتىن ادامدار بار. ءارى كەز كەلگەن سايتتى اشادى، «يۋتۋبتى» اشادى. كەشكىسىن مەن ۇيگە كەلگەن كەزدە قىزىم كوڭىل كۇيىمدى بىردەن بايقايدى. جانىما كەلەدى دە: «ماما، سەن ەشقاشان مۇڭايما. سەن تۋرالى وتىرىك جازىپ قويىپتى. مەن ءۇشىن سەن جاقسى ادامسىڭ، اسىل جانسىڭ» ، - دەيدى.
- ءسىز مۇقاعالي ولەڭدەرىنە جازىلعان اندەردى كوبىرەك ايتاتىن سياقتىسىز. بۇل اندەردە ءوز تاعدىرىڭىزبەن ۇندەستىك جاتىر ما؟
- جالپى، مەن ەشكىمگە وسىنداي ءان جازىپ الىپ كەلىڭدەر، ءسوزى مىناداي بولسىن دەپ قولقا سالمايمىن، تاپسىرىس بەرمەيمىن. اۆتورلار وزدەرى الىپ كەلەدى. مۇقاڭنىڭ قاي ولەڭىن الىپ كەلسە دە، مەن سونى ايتقىم كەلىپ تۇرادى. ول مەنىڭ تاعدىرىممەن بايلانىستى كورىنەدى. سول كىسىنىڭ پوەزياسىنىڭ ىشىنە ءوزىم جازعانداي بولىپ كىرىپ كەتەمىن. جۇرەگىمە، ىشكى جان دۇنيەمە جاقىن. ءان ايتقان كەزدە جەڭىلدەنىپ سالا بەرەمىن. ءان سالعاندا اۋىرىپ تۇرعان جۇرەگىم جازىلىپ كەتەدى. ىقىلاسىممەن بەرىلە ايتقان سوڭ، ىشكى جان دۇنيەمدى اناۋ- مىناۋ قوقىستاردان، بىرەۋلەردىڭ جاعىمسىز سوزدەرىنەن تازارتادى. بىرەۋگە جاۋاپ بەرۋ ءۇشىن دە ول ماعان كەرەك دۇنيە، البەتتە. مىسالى، «فاريزا» ءانىنىڭ ىشىندە وسىنىڭ ءبارى تۇر. كەز كەلگەن كونسەرتكە بارساڭ، «فاريزانى» ايتقىزباي جىبەرمەيدى. تىڭدارماندارىم اندەرىم ارقىلى ىشكى جان دۇنيەمدەگى ارپالىستى تۇسىنەدى دەپ ويلايمىن.
- ءسىزدى جۇرت پريمادوننا دەپ جاتادى. ءتىپتى روزاعا قاراعاندا ءسىزدىڭ ءومىرىڭىز جاقىن سەكىلدى. رەسەي پريمادونناسىمەن ۇقساستىعىڭىز بار. ا. پۋگاچيەۆا دا 2000 - جىلداردىڭ باسىندا ادامداردان كەشىرىم سۇراپ، مىنا ءومىردىڭ جالعاندىعىن ايتتى. «ەرتەڭ بارلىعىمىز مىنا ومىردەن كەتەمىز» دەدى جانايقايىمەن. سول كەزدە حالىق ا. پۋگاچيەۆانى ولەدى- اۋ دەپ ويلادى. ال 2009 -جىلى «ليۋدي، ليۋدي» انىمەن شىقتى. ءسىز دە «ادامدار، كەشىرىڭدەر» دەپ قايتا شىقتىڭىز ساحناعا. جالپى ءاندى تىڭدارمانعا جەتكىزۋ شەبەرلىكتەرىڭىز، ءاندەرىڭىزدىڭ ءبىر- ءبىر پەسادان، ءبىر- ءبىر درامادان تۇراتىن ۇقساستىقتارىڭىز تاعى بار...
- ءوزىمدى پريمادوننامىن دەپ ايتا المايمىن، باۋىرجان. بۇل راس ەندى. حالىقتىڭ اۋزىندا سولاي اتالساق، نە داۋا؟ ! وعان مەن داندايسىپ، مۇرنىمدى كوتەرگىم كەلمەيدى. كوزىمە ايتقان كوپ ادام بولدى. كوبىنە ورىستار ايتادى. دۇكەنگە، بازارعا بارعاندا كەزدەسكەن ورىستار كوپ ماقتاۋ ايتىپ جاتادى. كوشەدە توقتاتىپ الىپ: «ءسىز ءبىزدىڭ پريمادوننامىزسىز» ، «اسىرەسە دومبىرامەن ايتقان اندەرىڭىز ۇنايدى» دەيتىندەرىن قايتەسىڭ؟ ! كەيبىرەۋلەرى ورىستىڭ رومانستارىن نەگە ايتپاي كەتكەنىمدى سۇرايدى.
- نەگىزگى تابىس كوزىڭىز قانداي؟
- توي. ودان باسقا مەندە تابىس كوزى جوق. ءبىر وبلىسقا 7 مىڭ دوللارعا بارامىن. 15-16 ءان ايتامىن. ال ءوزىمىزدىڭ قالاعا (الماتى) 3-4 مىڭ دوللارعا شىعىپ ءجۇرمىن. ادامداردىڭ جاعدايىنا بايلانىستى. قىسىلىپ كەلىپ تۇرسا، كەيدە تەگىن بارامىن. نەگىزى كوبىنىڭ اقشاسى جوق ەندى (كۇلىپ الدى) . بارىنە بارا بەرمەيمىن. بىرەۋى «جەڭگەتاي» دەپ كەلەدى، ەندى ءبىرى «ارعىنمىن» دەپ كەلەدى. قايسىبىرىنە جەتە بەرەمىن؟ بۇيىرعانىنا بارامىن.
- «قارا پيار» دەگەنگە قالاي قارايسىز؟
- دۇرىس ەمەس. سوڭعى بولعان وقيعانى مەڭزەپ وتىرساڭىز، ول جاعداي تۋرا بەينە- جازباداعىداي ەمەس. تاماعىم ءبىتىپ قالعان. تۇنىمەن ءان ايتتىق، ونىڭ ۇستىنە قوناقۇي سۋىق بولدى. سويلەسۋگە بولمايدى ونداي كەزدە. شىعارىپ سالاتىن ادامدار كەشىگىپ الىپ كەلدى مەنى. مەن ولارعا كەشىگەتىنىمىزدى، الماتىدا سول كۇنى تويىمنىڭ بار ەكەنىن ايتتىم. ءوزىڭ ايتپاقشى «وي، ماكە، ءسىز پريمادونناسىز عوي، ءسىزدى وتكىزەدى» دەگەن ءسوز شىقتى. وزدەرىنە سەنىمدى بولدى. مەندە ورىن بيزنەسكلاسستان ەكەن. مەنى ۆيب- زالمەن الىپ كەلدى دە، قۇجاتتارىمدى وزدەرىمەن الىپ كەتتى. ۇشاققا وتىرعىزىپ جىبەردى. 15 مينۋتتان كەيىن ەكى جىگىت كەلىپ، مەنەن بيلەتتىڭ كوشىرمە نۇسقاسىن سۇرادى. نەگىزى ول قاجەت ەمەس. كومپيۋتەردە بارلىعى تۇر عوي. بىرەۋدىڭ تاپسىرماسى بولدى ما، الدە انا كىسىلەر رەنجىتتى مە، قاۋىپتىڭ قاي جەردەن كەلگەنىن تۇسىنبەدىم. قازىر قايتا كىرەسىز دەگەن سوڭ، ۇشاقتان شىقتىم. ەندى كەلىپ، ءسىز ۇشپايسىز دەيدى. قالاي اشۋلانبايسىڭ؟ بوقتادىم بارلىعىن. سونى ەندى ءتۇسىرىپ جاريالاپ جىبەرگەنىن قاراشى. الگى بالانى تاپتىم مەن. ءبىراق ول ەمەس ەكەن. بەلگىلى ءبىر كومپانيانىڭ قىزمەتكەرلەرى ەكەن. ءبىز ىزدەپ تاپقان جىگىت ءبىر جىل بۇرىن سول كومپانيادا جۇمىس ىستەگەن كورىنەدى. سونىڭ الەۋمەتتىك جەلىدەگى پاراقشاسىن پايدالانىپ وتىر عوي. العان دا، پاراقشاسىنا سالىپ جىبەرگەن. كەيىن ءوزىنىڭ بۇرىنعى باسشىسىنا قوڭىراۋ شالىپ، سوتقا بەرەتىندىگىن ايتقان. ءسويتىپ، كومپانيا باسشىلىعى جاسىرىن بەينەجازبانى الىپ تاستادى. مەن دە قاراپ قالعان جوقپىن. ءدال قازىر قورعاۋشىم بۇل ماسەلەمەن اينالىسىپ جاتىر. سوتتاسۋىم مۇمكىن. ال ەندى «ماقپال القاش» دەگەننىڭ ءىلىنىپ تۇرعانىنا سەگىز جىل بولدى. مىنانى وقىعان سايىن «القاش بولعىڭ كەلەدى ەكەن» دەپ قويامىن (كۇلىپ الدى) . كۇلكىلى ەمەس، جىلاعىڭ كەلەدى. تىرناقتاپ جيناعان ابىرويىمدى سولاي توككىسى كەلەدى. «ماقپال القاش» ، «ماقپال بوقتايدى» ، «ماقپال توبەلەسكىش» دەپ بىرەۋلەر شىقتى.
- استانادا ءوزىڭىزدى قالاي سەزىنەسىز؟
- وتە جاقسى سەزىنەمىن. كونسەرتكە، تويعا بارامىن. ءبىراق استانانىڭ «حان شاتىرىندا» عانا بولدىم. «بايتەرەكتىڭ» جانىنان وتكەن سايىن ۇيالامىن. استاناعا بارعانىمدا مەنى قىدىرتاتىن ەشكىم تابىلماي قالادى.
- سۇحباتىڭىزعا راقمەت!
باۋىرجان كاريپوۆ
baistars.kz
