قازاقستان بەيجىڭدە «ماحابباتقا شەك جوق» حالىقارالىق قايىرىمدىلىق جارمەڭكەسىنە قاتىستى - فوتو
وعان قازاقستاننىڭ ديپلوماتتارى، ۇلتتىق كومپانيا وكىلدەرى جانە قىتايدا وقيتىن قازاقستاندىق ستۋدەنتتەر قاتىستى. ق ح ر سىرتقى ىستەر ءمينيسترى ۋاڭ ي ءوزىنىڭ جارى شيان ۆەيمەن ق ر پاۆيلونىندا بولدى.
«بۇل قايىرىمدىلىق جارمەڭكەسى جىل سايىن وتەدى. قازاقستان وعان بەلسەندى قاتىسۋدا. جيىلعان قاراجاتتىڭ بارلىعى يۋننان پروۆينسياسىنداعى اۋىل مۇعالىمدەرىنە كومەك رەتىندە جونەلتىلەدى. وتكەن جىلى ءبىز 18 مىڭ يۋان (شامامەن 3 مىڭ دوللار - رەد. ) جيدىق. بۇل جارمەڭكەگە قاتىسۋشىلاردىڭ ىشىندەگى ەڭ كوبى بولدى»، - دەدى ق ح ر- داعى ق ر توتەنشە جانە وكىلەتتى ەلشىسى شاحرات نۇرىشيەۆ قازاقستاندىق جۋرناليستەرگە بەرگەن سۇحباتىندا.
جارمەڭكەگە قىتايدا اككرەديتتەلگەن 70 كە جۋىق شەتەل مەملەكەت پەن حالىقارالىق ۇيىمنىڭ وكىلدەرى قاتىستى.
قازاقستاندىق سورەلەر جارمەڭكەگە كەلۋشىلەردىڭ قىزىعۋشىلىعىن تۋدىردى. ق ر ۇلتتىق تاعامدارى، كيىزدەن جاسالعان بۇيىمدار، دومبىرا ءپىشىندى فلەش-كارتالار، «التىن ادام» كادەسىيلارى جانە ت. ب سۇرانىسقا يە بولدى.
ەسكە سالا كەتەيىك، «ماحابباتقا شەك جوق» ءداستۇرلى حالىقارالىق قايىرىمدىلىق جارمەڭكەسى 2009 -جىلدان قىتاي سىرتقى ىستەر ءمينيسترى جارىنىڭ پاتروناجىمەن ءوتىپ كەلەدى. وتكىزىلگەن التى جارمەڭكەدە بارلىعى شامامەن 80 ميلليون يۋان (12,7 ميلليون ا ق ش دوللارى) جيىلدى. قاراجات يۋننان، حىبي، گانسۋ، حىنان جانە گۋيجوۋ پروۆينسيالارىنداعى تۇرمىسى تومەن ادامدارعا كومەكتەسۋ ءۇشىن باعىتتالدى.
