تارازدا باس قاقپاسىندا قۇران كىتابى بەينەلەنگەن مەشىت اشىلدى - فوتو
اتالمىش مەشىتتى ق م د ب- نىڭ ءتوراعاسى، باس ءمۇفتي ەرجان قاجى مالعاجى ۇلى مەن جامبىل وبلىسىنىڭ اكىمى كارىم كوكىرەكبايەۆ اشتى. ءدۇبىرلى تويعا ات ارتىپ كەلگەن ءدىنباسى اللا ۇيىنە قۇران كىتابىن سىيعا تارتتى، دەپ حابارلانعان قازاقستان مۇسىلماندارى ءدىني باسقارماسىنىڭ سايتىندا.
قمدب- نىڭ جامبىل وبلىسى بويىنشا وكىلى دانيار قاجى جۇمابايەۆ قۇران باعىشتاپ، وبلىس اكىمى جاماعاتقا قۇتتىقتاۋىن جەتكىزدى. كۇندەردىڭ سۇلتانى جۇما كۇنى ءوز ەسىگىن ايقارا اشقان مۇسىلماندىق ورداسىندا ەكى راكات ءناپىل نامازى وقىلىپ، كەيىن ۋاعىز ايتىلدى. سونداي- اق ازان شاقىرىلىپ، جۇما نامازى وقىلدى.
بۇل مەشىتكە «كەڭەسكەن قاجى احايەۆ» اتى بەرىلدى. تولە ءبي داڭعىلىدا ورنالاسقان مۇناراسى كوك تىرەگەن مەشىتتىڭ يمامى بولىپ «حازىرەت سۇلتان» مەشىتىنىڭ نايب يمامى عازيز احمەتوۆ تاعايىندالدى. عيمارات ايەلدەر نامازحاناسىمەن، دارەتحانامەن قامتاماسىز ەتىلگەن. ونىڭ باس قاقپاسى قاسيەتتى قۇران كىتابىن بەينەلەيدى.
ال وندا پايعامبارىمىزعا (وعان اللانىڭ سالاۋاتى مەن سالەمى بولسىن) ۋاحي ەتىلگەن اياتتار جازىلعان. قۇرىلىس قابىرعاسىندا قازاقتىڭ ۇلتتىق ويۋ- ورنەكتەرى سالىنعان. مەشىت سىيىمدىلىعى - 1000 ادام.
اشىلۋ سالتاناتىنا سونىمەن قاتار نايب ءمۇفتي، «حازىرەت سۇلتان» مەشىتىنىڭ باس يمامى وراز سەرىكباي، ق م د ب- نىڭ ۋاعىز- ناسيحات ءبولىمىنىڭ مەڭگەرۋشىسى ەرشات وڭعاروۆ، الماتى قالاسىنىڭ باس يمامى نۇربەك ەسماعانبەت، ق م د ب- نىڭ ءىس باسقارۋشىسى ەربوسىن ورىن جانە قالا يمامدارى دا قاتىستى.
