قىسىلتاياڭ جاعدايدا ادامدارعا قولۇشىن سوزۋ پارىزىمىز - ن. تيۋكين، وقۋشى - فوتو
بۇل تۋرالى باتىس قازاقستان وبلىسى زەلەنوۆ اۋدانى دوستىق اۋىلىندا تۇراتىن 8-سىنىپ وقۋشىسى نيكيتا تيۋكين ءمالىم ەتتى.
ونىڭ ايتۋىنشا، مۇنداي دەڭگەيدەگى جيىنعا العاش رەت قاتىسقان. سوندىقتان ءبارى تاڭسىق، ءبارى قىزىق كورىندى. ونىڭ ۇستىنە استانا قانداي! بوس ۋاقىتتارىندا «بايتەرەك» سىندى ەلوردا كەرەمەتتەرىن كوزبەن كورۋدىڭ اسەرى بولەك ەدى.
پاتريوتتار فورۋمىندا عارىشكەر ايدىن ايىمبەتوۆ، اتاقتى بوكسشى گەننادي گولوۆكين جانە باسقا ايگىلى جاندارمەن بىرگە بولىپ، ولاردىڭ ءسوزىن تىڭداۋدىڭ ءوزى نەگە تۇرادى. وسىنداي وتانشىل ادامداردى كۇللى قازاق ەلى ماقتانىش تۇتىپ، ۇلگى الاتىنى انىق.
«مەن، ارينە، «جىل پاتريوتى» اتانامىن دەپ ويلاعانىم جوق. ءبارى كۇتپەگەن جەردەن بولدى. ونىڭ ۇستىنە «ەرلىگى ءۇشىن» اتالىمىن عارىشكەر ايدىن ايىمبەتوۆتىڭ قولىنان العانىمدا، كەۋدەمدى ماقتانىش سەزىمى كەرنەدى. ونداي باتىرلار كوپ ەمەس قوي. سوندىقتان بۇل جاقسى ىرىم دەپ ەسەپتەيمىن. بولاشاقتا توتەنشە جاعداي سالاسىنىڭ مامانى بولعىم كەلەدى. ادامدارعا ءار ۋاقىتتا كومەككە كەلۋگە دايىن تۇراتىن بولامىن. بۇل كىم- كىمنىڭ دە قولىنان كەلەدى. تەك ادال ءومىر ءسۇرىپ، بەيبىت اسپان استىندا ايانباي ەڭبەك ەتە ءبىلۋ كەرەك. ەڭ باستىسى، ەلباسى ۇسىنعان «ماڭگىلىك ەل» يدەياسىنىڭ جۇزەگە اسۋىنا ءبىز دە ءوز ۇلەسىمىزدى قوسىپ، ول ءۇشىن ءوز وتانىمىز بەن حالقىمىزدى سۇيە ءبىلۋ كەرەك»، - دەدى ن. تيۋكين.
ەسكە سالا كەتەيىك، ن. تيۋكين بيىلعى 24 -مامىردا شاعان وزەنىنە باتىپ بارا جاتقان قوس قىزدى اجالدان قۇتقارىپ قالعان بولاتىن. ونى ب ق و ت ج دەپارتامەنتى الداعى ۋاقىتتا كاسىبي قۇتقارۋشىلاردى دايارلايتىن كوكشەتاۋ تەحنيكالىق ينستيتۋتىنا وقۋعا شاقىرىپ وتىر.
