رەسەي تارابىنىڭ سۇرانىسىنا قاراماستان قازاقستان پولشانىڭ بالىق ونىمدەرىنە شەكتەۋ قويمايدى - گ. يسايەۆا

بۇل تۋرالى بۇگىن ۇلتتىق ۆەتەريناريا بويىنشا رەفەرەنتتىك ورتالىقتا بولعان كەزىندە ق ر اۋىل شارۋاشىلىعى ۆيتسە-ءمينيسترى گۇلميرا يسايەۆا ب ا ق وكىلدەرىنىڭ ساۋالىنا وراي وسىلاي دەدى.

«رەسەيدىڭ اۋىل شارۋاشىلىعى ونىمدەرىن قاداعالاۋ ورگانى بىزدەرگە حات جولدادى. وندا پولشانىڭ 14 بالىق وڭدەۋ كاسىپورنىن ينسپەكتسيالاۋدان باس تارتقانى ايتىلعان. وسىعان وراي رەسەيدىڭ اۋىل شارۋاشىلىعى ونىمدەرىن قاداعالاۋ ورگانى پولشانىڭ اتالعان 14 كاسىپورنىنان بالىق ونىمدەرىن الۋعا ۋاقىتشا شەكتەۋ ەنگىزدى. ءبىز بۇل شەكتەۋ شاراسىنا قوسىلمايمىز. ويتكەنى، «ينسپەكتسيا جۇرگىزۋ تۋرالى» قولدانىستاعى ەرەجەگە سايكەس ەگەر ينسپەكتسيا جۇرگىزىلمەسە وندا ناتيجە دە جوق دەگەن ءسوز. سوندىقتان قازاقستان جوق ناتيجەگە قوسىلا المايدى»، - دەدى ول.

ونىڭ اتاپ وتۋىنشە، ينسپەكتسيا ناتيجەسىندە كاسىپورىننىڭ ساپا، قاۋىپسىزدىك تالاپتارىنا سايكەستىگى، ياعني، ولاردىڭ قاۋىپسىز ءونىم شىعاراتىندىعى كورسەتىلۋى ءتيىس.

«ءبىراق، ە ا ە و- نىڭ تەحنيكالىق رەگلامەنت تالاپتارىنا ساي كەلمەيتىن ساپاسى تومەن ونىمدەردىڭ انىقتالۋ دەرەكتەرى تىركەلگەن جوق. سەبەبى، ينسپەكتسيانىڭ ءوزى جۇرگىزىلگەن جوق. وعان سايكەس تەرىس ناتيەجەلەر دە بەرىلمەيدى. سوندىقتان بۇل رەتتە قازاقستان اتالعان شارالارعا قوسىلمايدى. تاعى دا قايتالاپ ايتامىن، ءبىز قولدانىستاعى زاڭنامانى قاتاڭ ۇستانامىز»، - دەدى ۆيتسە-مينيستر.

سونىمەن قاتار گ. يسايەۆا ەلىمىزدىڭ اۋىل شارۋاشىلىعى ءمينيسترى رەسەيلىك تاراپقا رەسمي جاۋاپ بەرگەنىن باسا اتاپ ءوتتى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى