وڭتۇستىك قازاقستاندا مەملەكەتتىك قىزمەتتەن ۇمىتكەرلەر ءتارتىپ بۇزدى
2015-جىلدىڭ 9 ايىنىڭ كورسەتكىشى بويىنشا وبلىس اۋماعىندا تەستىلەۋ كەزىندە «ب» كورپۋسىنىڭ مەملەكەتتىك اكىمشىلىك لاۋازىمدارىنا ورنالاسۋعا جانە كادر رەزەرۆىنە تەست تاپسىرۋعا 2890 ۇمىتكەر كەلگەن.
سولاردىڭ 1037 ءى جوعارعى ناتيجە السا، ال ۇمىتكەر 1834 تەستەن ءسۇرىندى. وسى ارادا جىل باسىنان بەرى تەست تاپسىرۋ ەرەجەسىن 19 ازامات بۇزعان.
بۇل تۇستا مەملەكەتتىك قىزمەتشىلەر تاراپىنان ەرەجەنى ەكىنشى رەت بۇزعاندار دا بار. مىسالى، تەست بارىسىندا ا جانە ش ەسىمدى ازاماتتار ءبىر-ءبىرىنىڭ جەكە سايكەستەندىرۋ نومىرلەرىن كومپيۋتەرگە اۋىستىرىپ ەنگىزۋ ارقىلى تەست تاپسىرماق بولادى. الايدا تەستىلەۋ اكىمشىسى ولاردىڭ بۇل ارەكەتتەرىن بايقاپ قالعان. سوڭىنان تەستىلەۋ ەرەجەسىن بۇزۋ تۋرالى اكت ءتۇزىلىپ، كىنالىلەر تەست زالىنان شىعارىلدى.
سۇراۋ بارىسىندا ش. دەگەن ازامات ماڭعىستاۋ وبلىسى، مۇنايلى اۋدانى، مۇنايلى اۋداندىق قۇرىلىس بولىمىندە باس مامان بولىپ قىزمەت اتقاراتىنى انىقتالدى.
وسىعان بايلانىستى وبلىستىق مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتتى تاراپىنان مۇنايلى اۋدانى اكىمىنە جانە ماڭعىستاۋ وبلىسى بويىنشا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتى باسشىسىنا سول قىزمەتشىگە تارتىپتىك شارا قولدانۋ جونىندە حات جولداندى.
ناتيجەسىندە باس مامان ار-نامىس كودەكسىنىڭ تالاپتارىن ساقتاماي، مەملەكەتتىك قىزمەتتىڭ وڭ بەدەلىنە نۇقسان كەلتىرگەنى ءۇشىن قاتاڭ سوگىس الدى، دەپ حابارلايدى otyrar.kz.
