پ. پوروشەنكو: ۋكرايناعا قازاقستاننىڭ كومىرى كەرەك

«قازاقستان پرەزيدەنتىمەن رەفورمالاردى ۇلعايتۋ بويىنشا ۇنەمى جانە ءتيىمدى تاجىريبە الماسىپ وتىرامىز دەپ كەلىستىك. مەن قازاقستاننىڭ جەتىستىگىنە تاڭداي قاعاتىنىمدى ايتقىم كەلەدى. سوندىقتان، ۋكراينادا دا دامۋعا باستايتىن رەفورمالاردى ورىستەتكىم كەلەدى. ءبىز "ۋكراينا-2020" ستراتەگياسىن جۇزەگە اسىرماقپىز. وسى باعدارلاما اياسىندا ۋكراينادا جاپپاي جەكەشەلەندىرۋ جۇرەدى. ءقازىر بىزدە مەملەكەتكە تيەسىلى 1800 دەن استام نىسان بار»، - دەگەن ۋكراينا پرەزيدەنتى ول نىساندار مەملەكەتتىڭ باسقارۋىندا بولعاننان گورى، جەكە قولعا ءوتىپ، كوركەيە الاتىنىن اتاپ ءوتتى.

بۇل رەتتە پ. پوروشەنكو ۋكراينا قازاقستان مەن كانادا مەملەكەتتەرىنەن ينۆەستيتسيا كۇتەتىنىن جەتكىزدى.

«ءبىز كانادا مەن قازاقستاننىڭ ينۆەستورلارىن كۇتەمىز. وسى ەلدەردىڭ ينۆەستورلارى كەلىپ، ءبىزدىڭ بيزنەس ورتانىڭ ينۆەستيتسيالىق تارتىمدىلىعىن باعالاسا، ءبىز ءوز تاراپىمىزدان اشىقتىق پەن ءتيىمدى جۇمىسقا كەپىلدىك بەرەمىز. بۇگىن ءبىز ەنەرگەتيكا سالاسىنداعى ىنتىماقتاستىق تۋرالى ۇستانىمدارىمىزدى انىقتادىق. ۋكاريناعا قازاقستاننىڭ كومىرى وتە قاجەت، مۇناي- گاز ونەركاسىبى سالاسىنداعى ىنتىماقتاستىقتار بويىنشا دا ۇستانىمدارىمىزدى انىقتاپ الدىق. سوندىقتان، ۋكرايناعا «قازمۇنايگاز» وكىلدەرى كەلەدى دەپ كۇتەمىز، سەبەبى، مۇناي ونىمدەرىن وڭدەپ شىعاراتىن نارىققا ورتاق جول قاراپ، وي ەلەگىنەن وتكىزۋىمىز كەرەك»، - دەدى پ. پوروشەنكو.

ۋكراينا پرەزيدەنتى اتاپ وتكەندەي، ەكى تاراپ اۋىل شارۋاشىلىعى سالاسىندا ماشينا قۇراستىرۋ، اۋىل شارۋاشىلىعى سالاسىنىڭ ءوزىن دامىتۋ مەن ازىق- تۇلىك ونەركاسىبى سالاسىندا كەلىسسوزدەر وتكىزگەن.

«سونىمەن قاتار، قۋاتتى جانە ءتيىمدى تاسىمال جەلىسىن قۇرۋ جونىندە ۋاعدالاستىققا قول جەتكىزدىك، جىبەك جولىنىڭ نەگىزگى قۇرامداس ەلەمەنتى رەتىندە «قازاقستان- ۋكراينا» باعىتىندا جول تاريفتەرىن تومەندەتۋ تۋرالى كەلىستىك»، - دەدى ءسوزىن تۇيىندەگەن پ. پوروشەنكو.

اۆتور: كەنجەكەي توقتامۇرات قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى