قازاقستان قۇراماسى قازاق كۇرەسىنەن حالىقارالىق «ەۋرازيا بارىسى» تۋرنيرىنىڭ جەڭىمپازى بولدى

تۋرنيردىڭ فينالىندا قازاقستان مەن وزبەكستان قۇراما كوماندالارى كەزدەستى.

العاشقى ءتورت جەكپە- جەكتەن كەيىن- اق قازاقستان 4.0 ەسەبىمەن ابسوليۋتتى جەڭىمپاز بولدى. ونىڭ ۇستىنە بارلىق ءتورت جەڭىس تە مەرزىمىنەن بۇرىن اياقتالدى.

ءسويتىپ، قازاقستاندىق پالۋاندار قازاق كۇرەسىنەن تۋرنير جەڭىمپازى اتاندى. ەكىنشى ورىندا - وزبەكستان قۇراماسى. ءۇشىنشى ورىن گرۋزيا پالۋاندارىنا بۇيىردى.

«تاراز- ارەنا» سپورت سارايىنداعى سايىستارعا گرۋزيادان، قازاقستاننان، قىرعىزستاننان، موڭعوليادان، پولشادان، رەسەيدەن، تۇركيادان جانە وزبەكستاننان 8 پالۋاندار كومانداسى قاتىستى. حالىقارالىق «ەۋرازيا بارىسى» تۋرنيرىنىڭ تەليەۆيزيالىق نۇسقاسى الەمنىڭ 126 ەلىنە تاراتىلدى.

تۋرنيردى «قازاقستان بارىسى» قازاق كۇرەسىن دامىتۋ قورى، «استانا» پكسك، ق ر قازاق كۇرەسى فەدەراتسياسى، سپورتتىق جەكپە- جەك جانە كۇش قولدانىلاتىن سپورت تۇرلەرى كونفەدەراتسياسى جامبىل وبلىسىنىڭ اكىمدىگى مەن ق ر مادەنيەت جانە سپورت مينيسترلىگىنىڭ قولداۋىمەن ۇيىمداستىردى.

جارىستىڭ جالپى جۇلدە قورى 18,8 ميلليون تەڭگەنى قۇرادى. جەڭىمپاز 9,4 ميلليون تەڭگەنى يەلەنسە، ەكىنشى ورىن العان كوماندا 5,64 ميلليون تەڭگە، ءۇشىنشى ورىن العان ۇجىم 3,76 ميلليون تەڭگە ولجالايدى.

العاش رەت ۇلتتىق سپورت تۇرلەرىن دارىپتەۋگە باعىتتالعان قازاق كۇرەسى بويىنشا «ەۋرازيا بارىسى» حالىقارالىق تۋرنيرى 2013 -جىلى تاراز قالاسىندا وتكەن بولاتىن. وعان ەۋروپا مەن ازيانىڭ سەگىز ەلىنەن سپورتشىلار قاتىستى. 2013 -جىلى قازاقستان قۇراماسى جەڭىسكە جەتسە، 2014 -جىلى جەڭىس تۇعىرىنا موڭعوليا كومانداسى كوتەرىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى