ۋكراينا حالقى ءۇشىن قازاقستاننىڭ حالىقارالىق قۇقىقتاعى ۇستانىمدارعا بەرىكتىگى زور ماڭىزعا يە - پ. پوروشەنكو
بۇگىن اقوردادا ەلىمىزگە العاشقى مەملەكەتتىك ساپارمەن كەلگەن ۋكراينا پرەزيدەنتى پەتر پوروشەنكو ەلباسى نۇرسۇلتان نازاربايەۆپەن كەڭەيتىلگەن قۇرامداعى كەلىسسوزدەر بارىسىندا وسىلاي دەدى.
«مەن بىزدەردىڭ بۇگىنگى كەلىسسوزدەرىمىزدىڭ، سونىمەن بىرگە ءسىزدىڭ كيەۆكە ساپارىڭىز بارىسىنداعى كەلىسسوزدەردىڭ ناتيجەلەرى ەلدەرىمىز اراسىنداعى سەرىكتەستىكتى، ساۋدا- ەكونوميكالىق، گۋمانيتارلىق، الەۋمەتتىك، ەڭ باستىسى ساياسي ىنتىماقتاستىقتىڭ جاندانۋىنا سەپتىگىن تيگىزەرىنە سەنىمىم مول»، - دەدى ۋكراينا پرەزيدەنتى.
سونىمەن قاتار ول ق ر پرەزيدەنتىمەن جەكە اڭگىمەلەسۋى بارىسىندا ەكى ەلدىڭ اراسىنداعى ىنتىماقتاستىقتىڭ بارلىق باعىتتارى تىڭعىلىقتى تالقىعا تۇسكەنىن باسا ايتتى. پ. پوروشەنكو ن. نازاربايەۆتىڭ قازاقستان مەن ۋكراينا اراسىنداعى ساياسي سۇحباتتاستىقتى سەنىم، ءداستۇرلى ءوزارا قۇرمەت نەگىزىندە دامىتۋعا نيەتتى ەكەندىگىنە ريزاشىلىق تانىتتى.
ۋكراينا پرەزيدەنتىنىڭ اتاپ وتۋىنشە، ۋكرايندىقتار ءۇشىن قازاقستاننىڭ حالىقارالىق قۇقىقتىق ىرگەلى ۇستانىمدارعا بەرىكتىگى، ەگەمەندىكتى، حالىقارالىق تانىلعان شەكارا اياسىندا اۋماق تۇراقتىلىعىنا قۇرمەتپەن قاراۋى زور ماڭىزعا يە.
«وسى رەتتە سىزگە، قازاقستان ۇكىمەتى مەن حالقىنا وسىناۋ بەرىك ۇستانىمى ءۇشىن شىنايى ريزاشىلىعىمدى بىلدىرگىم كەلەدى»، - دەدى ۋكراينا پرەزيدەنتى.
اۆتور: مارلان جيەمباي
