جاڭاقالادا قازاقتىڭ تۇڭعىش كاسىبي ديريجەرى ش. قاجىعاليەۆتىڭ ءمۇسىنى ورناتىلدى - فوتو
ءمۇسىندى بەلگىلى ديريجەر، كومپوزيتور، قازاقستاننىڭ ەڭبەك سىڭىرگەن قايراتكەرى قىرىمگەرەي قاجىموۆ پەن اۋدان اكىمى لاۆر حايرەتدينوۆ سالتاناتپەن اشتى.
اۋدان باسشىسىنىڭ ايتۋىنشا، الىپتار اللەياسىنا وسىمەن جاڭاقالادان شىققان جەتىنشى كۇيشىنىڭ ءمۇسىنى ورناتىلىپ وتىر. بۇعان دەيىن قۇرمانعازى، دينا، وقاپ قابيعوجين، قالي جانتىلەۋوۆ، مامەن، تۇياقبەردى شامەلوۆتىڭ ەسكەرتكىشى ساپ تۇزەگەن ەدى. بۇلاردىڭ ءبارىنىڭ دە اۆتورى - ورالدىق ءمۇسىنشى رافاەل شامسۋتدينوۆ.
كوزى تىرىسىندە قۇرمانعازى اتىنداعى قازاق مەملەكەتتىك اكادەميالىق وركەسترىنە، ودان كەيىن تاتتىمبەت اتىنداعى اكادەميالىق حالىق اسپاپتار وركەسترىنە جەتەكشىلىك ەتىپ، حالقىمىزدىڭ ونەرىن كۇللى الەمگە تانىتقان شامعون قاجىعاليەۆتىڭ بيىل دۇنيەدەن ءوتىپ، الماتىداعى كەڭسايدا جەرلەنگەنى بەلگىلى. الداعى ۋاقىتتا بىرەگەي تۇلعانى ەسكە الۋعا ارنالعان مادەني شارالار مەن بايقاۋلار ۇيىمداستىرىلاتىن بولادى.
