جاس الپىستان اسقاندا دا بيزنەس باستاۋعا بولادى

سول ارقىلى ءبىرىنشى رەت كاسىپ باستاپ، بيزنەس اشقان ادامدار سانى جىل ساناپ ارتۋدا. سونىڭ ءبىرى - پايعامبار جاسىنان اسقان كاسىپكەر كەيۋانا قالدىكۇل قايىپوۆا.

الگىندە ايتقانىمىزداي، 66 جاستاعى قالدىكۇل اپا 1976 -جىلى الماتىداعى جەڭىل جانە تاماق ونەركاسىبى ۋچيليشەسىن تەحنولوگ ماماندىعى بويىنشا بىتىرگەن. سودان بەرى نان ونىمدەرىن ءپىسىرۋ سالاسىندا جەمىستى ەڭبەك ەتىپ كەلەدى.

ەڭبەكقور جان كوپ جىلدار قاراتاۋ قالاسىنداعى ناۋبايحانادا تەحنولوگ، شەبەر، ديرەكتور سەكىلدى قىزمەتتەردى ءمىنسىز اتقارا ءجۇرىپ، 2000 -جىلدارى ءوزىنىڭ دەربەس ناۋبايحاناسىن اشۋ تۋرالى ويلانا باستايدى. نان ءپىسىرۋ - كوزىن اشقالى بەرگى اينالىسىپ كەلە جاتقان كاسىبى، ومىرلىك ءىسى، نەگە اينالىسۋعا بولماسىن؟ ونىڭ بۇكىل قىر-سىرىنا قانىق. وسىلايشا 2003 -جىلى «قايىپوۆا» جەكە كاسىپكەرلىگى قۇرىلىپ، «انەل» اتتى شاعىن ناۋبايحانا دۇنيەگە كەلدى. تازا ءارى جاڭا تەحنولوگيامەن پىسىرىلگەن اس اتاسى كۇندەلىكتى دۇكەندەرگە وتكەرىلىپ تۇرادى. تابىس جامان ەمەس. كاسىپورىن نەگىزىنەن تاپسىرىسپەن دە، اينالىم بويىنشا دا جۇمىس ىستەيدى. ال، جۇمىسشى- ماماندارعا كەلسەك، بەس بالانىڭ ارداقتى اناسى، كونەكوز تەحنولوگ كوبىندە ءوزىنىڭ بالالارىنا ارقا سۇيەيتىن.

پەرزەنتتەرى دە سەنىمىن اقتاماي قالعان جوق. بۇگىندە ەكى ۇلى مەن كەلىندەرى وسىندا وزىنە كومەكشى. بىلايشا ايتقاندا، بۇل - وتباسىلىق بيزنەستىڭ زور ۇلگىسى. جانە سول بيزنەستىڭ باستاۋىندا الپىستان اسقان بەينەتقور انا تۇر دەگەنگە العاشىندا سەنە دە المايدى ەكەنسىڭ. اپامىز ءالى دە تىڭ ءارى قۋاتتى. قاجىر- قايراتى كەز كەلگەن جاستان كەم ءتۇسىپ تۇرعان جوق. «ەڭبەك ادامدى قارتايتپايدى، قايتا، كۇش- جىگەرىڭدى ەسەلەي تۇسەدى ەكەن»، - دەيدى كۇلىپ قالدىكۇل اپا.

قالدىكۇل قايىپوۆا «بيزنەستىڭ جول كارتاسى-2020» باعدارلاماسى تۋرالى بىلمەيتىن. جالپى، ول كىسى قارجىلىق وپەراتسيالاردان مۇلدە بەيحابار ەدى. بارلىعى كەزدەيسوق باستالدى. جەمىستى جۇمىس ىستەپ جاتقان ناۋبايحاناسىنداعى ءوندىرىستى، سوعان وراي، عيماراتىن دا كەڭەيتپەكشى بولعان ول «سەنتركرەديت» بانكىنىڭ وبلىستىق فيليالىنا نەسيە الۋ ماقساتىندا ءوتىنىش بەرەدى. كەپىل مۇلكى رەتىندە ءوزىنىڭ قاراتاۋ قالاسىنداعى پاتەرى مەن ناۋبايحاناسىن ۇسىندى. العاشىندا 16 پايىزدىق مولشەرلەمەمەن نەسيە بەرگەلى وتىرعان بانك كەيىن مولشەرلەمەنى 14 پايىزعا دەيىن ءتۇسىردى. ال، باعدارلاما تالاپتارى بويىنشا پايىزدىق مولشەرلەمە 14 پايىزدان اسپاسا، ونىڭ 50 پايىزى مەملەكەت قارجىسىمەن سۋبسيديالانادى، ياعني نەسيە الۋشى كليەنت 7 پايىزىن ءوزى، قالعانىن مەملەكەت تولەيدى.

ارينە، مۇندا اۋدان باسشىلىعىنىڭ دا ءرولى زور. تالاس اۋدانى اكىمدىگى كاسىپكەرلىك جانە اۋىل شارۋاشىلىعى ءبولىمىنىڭ قىزمەتكەرلەرى كاسىپكەر اپادان كەرەكتى اقىل- كەڭەستى اياماي، ۇنەمى جول كورسەتىپ وتىردى. ناتيجەسىندە قالدىكۇل اپا 2,2 ميلليون تەڭگە نەسيە الىپ، اۋماعى 200 شارشى مەتر بولاتىن جاڭا ناۋبايحانا تۇرعىزدى. عيماراتقا 740 مىڭ تەڭگەگە گاز كىرگىزىپ، قۇنى 1,5 ميلليون تەڭگە بولاتىن نان پىسىرەتىن جاڭا تەحنولوگيا ورناتتى. بۇگىندە «انەل» ناۋبايحاناسى 20 عا جۋىق ادامدى تۇراقتى جۇمىسپەن قامتىپ وتىر. مۇندا كۇندەلىكتى 2 مىڭ دانا نان ءپىسىرىلىپ، قاراتاۋ قالاسىنداعى ونداعان ساۋدا نۇكتەلەرىنە جەتكىزىلىپ وتىرادى. سونداي-اق، تاپسىرىس بويىنشا بارلىق نان، تورت ونىمدەرىن ازىرلەيدى. كاسىپورىننىڭ تەحنولوگياسى كۇنىنە 2,5-3 مىڭنان استام نان شىعارۋعا قابىلەتتى.

- 35 جىل بويى حالىق ءۇشىن نان ءپىسىرىپ، 10 جىلدان بەرى ونى جەكە كاسىپكە اينالدىرساق تا، كاسىپكەرلىكتىڭ ءبىز بىلمەيتىن قىر- سىرى، ۇڭعىل- شۇڭعىلى كوپ ەكەن. جىلدار ءوتىپ، تاجىريبەم مولايعان سايىن ءبىراز دۇنيەگە قانىعىپ، جەتىك مەڭگەرىپ كەلەم. بۇرىن نەسيە دەگەندى دە بىلمەي كەلىپ ەدىم. ەندى مىنە، ومىرىمدە ءبىرىنشى رەت نەسيە الىپ تۇرىپ، سالعان جەردەن- اق بىردەن مەملەكەت قولداۋىنا يە بولىپ وتىرمىن.

بىرنەشە رەت كاسىپكەر ايەلدەر فورۋمىنا قاتىستىم. ودان دا ءبىراز جاڭا دۇنيەلەر ۇيرەنىپ قايتتىم. جالپى، بۇنىمەن توقتاپ قالاتىن ويىمىز جوق، العا قويعان جوسپارلارىمىز وتە كوپ، - دەيدى قالدىكۇل اپا. قاريانىڭ ەرتەڭگى كۇنگە ەرەكشە سەنىمى مەن جارقىن وپتيميزمى ورىمدەي جاستىڭ ءوزىن قايران قالدىرارىنا داۋ جوق.

جانات قاپالبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى