قازاقستاندا شەتەل اقشاسىمەن يپوتەكا بەرۋگە تىيىم سالىنادى - ن. سابيليانوۆ
بۇل تۋرالى بۇگىن ءماجىلىستىڭ جالپى وتىرىسىندا دەپۋتات نۇرتاي سابيليانوۆ ءمالىم ەتتى.
ەسكە سالا كەتەيىك، ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكىنشى دەڭگەيدەگى بانكتەردىڭ جۇمىس ىستەمەيتىن كرەديتتەرى مەن اكتيۆتەرى، قارجىلىق قىزمەتتەر كورسەتۋ جانە قارجى ۇيىمدارى مەن قازاقستان رەسپۋبليكاسى ۇلتتىق بانكىنىڭ قىزمەتى ماسەلەسى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭىنىڭ جوباسى ەكىنشى وقىلىمدا ماقۇلدانعان بولاتىن.
«زاڭ جوباسى شەڭبەرىندە قازاقستاننىڭ دۇنيەجۇزىلىك ساۋدا ۇيىمىنا كىرۋىنە بايلانىستى شەتەلدىك بانكتەر فيليالدارىنىڭ جاۋاپتىلىعى دا بەكىتىلىپ وتىر. سونىمەن قاتار، شەتەلدىك بانكتەردىڭ فيليالىنا ۇلتتىق بانك تاراپىنان باقىلاۋ جاساۋ قۇقىعى ۇسىنىلادى. ەكىنشى، قارجىلىق قىزمەتتەردى تۇتىنۋشىلاردىڭ قۇقىعىن قورعاۋ ماقساتىندا شەتەلدىك ۆاليۋتادا تابىسى جوق جەكە تۇلعالارعا شەتەلدىك ۆاليۋتادا يپوتەكالىق قارىز بەرۋگە تىيىم سالۋ كوزدەلەدى. بۇدان بولەك، قارىز تولەۋگە قابىلەتسىز الۋشىنىڭ مىندەتتەمەلەرىنە قاتىستى ەرەكشە ءتارتىپ قاراستىرىلىپ وتىر. ايتا كەتەيىك، بۇرىن قارىز تولەۋگە قابىلەتسىز تۇلعا ەڭ ءبىرىنشى كەزەكتە بانكتەردىڭ شىعىندارىن وتەپ، سوسىن عانا نەگىزگى قارىزىن تولەۋى ءتيىس ەدى. بۇل تۇتىنۋشىلارعا قيىندىق تۋدىرعان بولاتىن»، - دەدى ن. سابيليانوۆ.
سونىمەن قاتار، دەپۋتاتتىڭ ايتۋىنشا، زاڭ جوباسىنا سايكەس، يپوتەكالىق نەسيە شارتى بويىنشا مىندەتتەمە مەرزىمى وتكەننەن سوڭ 180 كۇننەن كەيىن سىيىاقى مەن تۇراقسىزدىق ايىبىن ەسەپتەن شىعارۋ نورماسى دا قامتىلىپ وتىر. نەسيەنىڭ دە تۇراقسىزدىق ايىبىنىڭ دا مولشەرى قايتا قارالدى. ەندى 90 كۇننەن كەيىن نەسيە ايىبى تومەن ستاۆكامەن ەسەپتەلەدى، سوسىن بۇل بەرىلگەن نەسيەنىڭ 10 پايىزىنان اسپاۋى كەرەك.
«بۇدان باسقا، قارجىلىق تۇراقتىلىقتى قولداۋ ماقساتىندا ۇلتتىق ۆاليۋتانىڭ ەركىن وزگەرمەلى باعامىنا كوشۋىنە بايلانىستى جەكە تۇلعالاردىڭ وتەماقى تولەۋگە قاتىستى وپەراتسيالار جۇرگىزۋ جونىندەگى وكىلەتتىلىكتەرى قارالىپ وتىر. وسى رەتتە تۇلعالاردىڭ ۆاليۋتا ايىرباستاۋدىڭ نارىقتىق باعامىنان ايلا- شارعى جاساۋ ماقساتىندا مامىلەلەر جاساعانى ءۇشىن جاۋاپتىلىعى قاراستىرىلدى»، - دەدى دەپۋتات.
اۆتور: قانات مامەتقازى ۇلى
