كەلەسى جىلى قازاقستاندا ءار گەكتار ءۇشىن بەرىلەتىن سۋبسيديا جويىلادى - ا. مامىتبەكوۆ
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە ق ر اۋىل شارۋاشىلىعى ءمينيسترى اسىلجان مامىتبەكوۆ ءمالىم ەتتى.
مينيستر ءمالىم ەتكەندەي، 2017 - جىلدان باستاپ مال شارۋاشىلىعىندا ءونىمنىڭ ليترىنە، كەلىسىنە، ءار جۇمىرتقاعا بەرىلىپ جاتقان سۋبسيديالار دا وزگەرىپ، ورنىنا تەحنيكا مەن نەسيە پايىزدارىن قولدايتىن سۋبسيديالار پايدا بولادى. قازىرگى مەملەكەتتىك قولداۋ شارالارى ءتيىمسىز بولىپ وتىرعان سوڭ، مينيسترلىك وسى قادامعا بارۋعا ءماجبۇر بولىپ وتىر.
«اۆستراليانىڭ كەرنس دەگەن قالاسىندا 1986 - جىلى 19 ەل توپتاسقان وداق قۇرىلعان. سول ەلدەردىڭ تاجىريبەسىن زەرتتەي كەلە، كوزىمىز جەتكەنى، ولار وزىندىك قۇنىن بۇرمالامايتىن سۋبسيديالاردى ازايتىپ، كەرىسىنشە، جالپى سيپاتتاعى سۋبسيديالاردى، ينفراقۇرىلىمدى قولدايتىن سۋبسيديالاردى، نەسيەلەردىڭ پايىزىن ازايتاتىن ينۆەستيتسيالىق سۋبسيديالاردى، عىلىم مەن كونسۋلتاتسيالاردى كوبەيتۋدىڭ ارقاسىندا ۇلكەن جەتىستىكتەرگە جەتتى. وسى توپتىڭ ىشىندە اۆستراليا، جاڭا زەلانديا، ارگەنتينا، برازيليا سياقتى اۋىل شارۋاشىلىعى سالاسىندا ۇلكەن جەتىستىكتەرگە جەتكەن ەلدەر بار.
ءبىز ىشكى جاعدايىمىزدى زەرتتەيتىن بولساق، بەرىلەتىن سۋبسيديالاردىڭ كوبى ەشقانداي ىنتالاندىرۋ ماقساتىن كوزدەمەيتىنىن جانە سۋبسيديا كۇندەلىكتى قاراجاتقا كەتىپ قالاتىنىن كورىپ وتىرمىز. بۇل جاعداي ءبىزدىڭ اۋىل شارۋاشىلىعى سالاسىنداعى تەحنيكانىڭ جەتىسپەۋشىلىگىنە، تەحنولوگيالاردىڭ مۇلدە قولدانىلماۋىنا اكەپ سوقتى. ويتكەنى، تەحنيكا الايىن دەسە، قاراپايىم شارۋالاردىڭ قاراجاتى جوق، بانككە نەمەسە ليزينگتىك كومپانياعا بەرەتىن كەپىلدىگى جوق. ەگەر، الاتىن بولسا، ۇستەمدىك پايىزى وتە جوعارى بولادى. سوندىقتان دا، ءبىز وڭىرلەرمەن، بيزنەس وكىلدەرىمەن اقىلداسا كەلە، ءار گەكتار ءۇشىن بەرىلەتىن وسىمدىك شارۋاشىلىعىنداعى سۋبسيديالادى كەلەسى جىلدان باستاپ جوققا شىعارىپ، ونىڭ ورنىنا ينۆەستيتسيالىق سۋبسيديالار مەن عىلىم باعىتىنداعى سۋبسيديا ءبولۋ تۋرالى شەشىم قابىلدادىق»، - دەدى ا. مامىتبەكوۆ.
بۇل رەتتە، ۆەدومستۆو باسشىسى حابارلاعانداي، تىڭايتقىش، تۇقىم ساتىپ الۋعا بەرىلەتىن سۋبسيديالار قالادى.
«ال 2017 -جىلدان باستاپ مال شارۋاشىلىعىندا ليترىنە، كەلىسىنە، ءار جۇمىرتقاعا بەرىلىپ جاتقان سۋبسيديالاردى دا وزگەرتىپ، كەرىسىنشە، تەحنيكا ساتىپ الۋعا بەرىلەتىن سۋبسيديالارعا بەت بۇرامىز. وسىنداي قولداۋ شارالارىن ۇكىمەتكە ۇسىندىق، كەشە قولداۋ تاپتىق. ەندى كەلەسى جىلدىڭ بيۋدجەتىنە ءتيىستى وزگەرىستەر ەنگىزەمىز»، - دەپ اتاپ ءوتتى اۋىل شارۋاشىلىعى ءمينيسترى.
اۆتور: كەنجەكەي توقتامۇرات قىزى
