قازاقستان مەن سەربيا ينۆەستيتسيالاردى ءوزارا قورعايتىن بولادى
اتالعان كەلىسىمگە استانا قالاسىندا 2010-جىلى 7- قازاندا استانادا سەربيا پرەزيدەنتىنىڭ ەلىمىزگە رەسمي ساپارى اياسىندا قول قويىلعان بولاتىن. كەلىسىمگە سايكەس، ءار تاراپ ءوز اۋماعىندا ەكىنشى تاراپ ينۆەستورلارى مەن ينۆەستيتسيالارىنا قايسىسى قولايلىراق بولاتىندىعىنا بايلانىستى رەجيم ۇسىنادى.
بۇدان بولەك، قازاقستان مەن سەربيا ءوز مەملەكەتتەرىنىڭ زاڭنامالارىنا سايكەس، بارلىق سالىق مىندەتتەمەلەرىن ورىنداعان ينۆەستورلارعا ولاردىڭ ينۆەستيتسيالارىنا بايلانىستى سومالاردى جانە ينۆەستيتسيالارعا قاتىستى اۋدارىلاتىن تولەمدەر اۋدارىلىمىن قامتاماسىز ەتۋگە ۋاعدالاسىپ وتىر.
«سەربيا قازاقستان ءۇشىن پەرسپەكتيۆالىق ءارى ماڭىزدى ارىپتەس بولىپ تابىلادى. سونىمەن قاتار سەربيا قازاقستاننىڭ 2017-2018-جىلدارىنا ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە كانديداتۋراسىنا قولداۋ بىلدىرگەن. ەكى ەل اراسىنداعى ىنتىماقتاستىق الەۋەتى وتە زور»، - دەدى ينۆەستيتسيالار جانە دامۋ ۆيتسە-ءمينيسترى راحىم وشاقبايەۆ.
ونىڭ ايتۋىنشا، تۇتاستاي العاندا 2005-جىلدان باستاپ 2015-جىلدىڭ ءبىرىنشى توقسانىنا دەيىنگى ارالىقتا سەربيانىڭ قازاقستانعا ينۆەستيتسيالارى 6,3 ميلليون دوللاردى قۇراعان. ال وسى كەزەڭدە قازاقستاننىڭ سەربياعا ينۆەستيتسياسى ەكى ميلليون دوللاردى قۇراپ وتىر.
«كەدەن ورگاندارىنىڭ مالىمەتتەرىنە قاراعاندا، قازاقستان مەن سەربيا اراسىنداعى تاۋار اينالىمى تۇراقتى تۇردە ءوسىپ وتىر. ماسەلەن، اعىمداعى جىلدىڭ قاڭتار-مامىر ايلارىندا تاۋار اينالىمى 7,8 ميلليون دوللاردى قۇراسا، بىلتىرعى 2014-جىلى بۇل كورسەتكىش 20 ميلليون دوللارعا جەتكەن بولاتىن»، - دەدى ر. وشاقبايەۆ.
ءماجىلىس ماقۇلداعان زاڭ جوباسى سەناتقا جولدانادى.
اۆتور: قانات مامەتقازى ۇلى
