ارناۋلى مەملەكەتتىك جاردەماقىلاردىڭ التى ءتۇرى وڭتايلاندىرىلادى
بۇل تۋرالى كەشە سەناتتىڭ الەۋمەتتىك- مادەني دامۋ جانە عىلىم كوميتەتىنىڭ وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتى الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ بارىسىندا ءمالىم بولدى.
ايتا كەتەيىك، زاڭ جوباسى مەملەكەت باسشىسىنىڭ بەس ينستيتۋتسيونالدىق رەفورماسى اياسىنداعى «100 ناقتى قادام» اتتى ۇلت جوسپارىندا قامتىلعان الەۋمەتتىك كومەكتىڭ اتاۋلىلىعىن كۇشەيتۋ تۋرالى تاپسىرماسىن ورىنداۋعا باعىتتالعان.
بۇل رەتتە زاڭ جوباسى ەكونوميكالىق ىنتىماقتاستىق ۇيىمىنا كىرەتىن مەملەكەتتەر تاجىريبەسىن ەسكەرە وتىرىپ، جاڭا فورماتتاعى اتاۋلى الەۋمەتتىك كومەكتى تاعايىنداۋ كوزدەلەدى. وسىعان بايلانىستى، اتاۋلى الەۋمەتتىك كومەكتەر بۇعان دەيىن بەرىلىپ كەلگەن مولشەردەن كەم بولماۋى ءۇشىن كەدەيشىلىك شەگىنىڭ 40 پايىزىنان 50 پايىزعا قاراي كوتەرىلەدى. جاڭا فورماتتاعى اتاۋلى الەۋمەتتىك كومەكتىڭ تاعى ءبىر ەرەكشەلىگى ەگەر وتباسىنداعى ازاماتتار ەڭبەك ەتۋگە قابىلەتتى بولسا، وندا كومەك الەۋمەتتىك جۇمىس ۇسىنۋ اياسىنداعى كەلىسىمشارت نەگىزىندە جاسالادى. بۇل رەتتە وتباسىنىڭ ەڭبەك ەتۋگە قابىلەتتى مۇشەلەرى جۇمىسپەن قامتۋدىڭ بەلسەندى شارالارىنا قاتىسۋعا مىندەتتى بولادى. ەگەر ەڭبەك ەتۋگە قابىلەتتى ازاماتتار مۇنداي شارالاردان باس تارتاتىن بولسا، وندا اتاۋلى الەۋمەتتىك كومەك تەك وتباسىنداعى بالالارعا عانا تاعايىندالاتىن بولادى.
بۇدان بولەك، تولەمدەرگە اكىمشىلىك ەتۋدى وڭايلاتۋ ماقساتىندا ارناۋلى مەملەكەتتىك جاردەماقىلاردىڭ 6 ءتۇرى وڭتايلاندىرىلادى. سونىڭ ىشىندە تۇرمىسى تومەن وتباسىلاردى قولداۋعا ارنالعان جەكەلەگەن الەۋمەتتىك باعدارلامالار بويىنشا شارالاردى كۇشەيتۋ، تابىسى از وتباسىلاردى ايقىنداۋدا ءبىرىڭعاي ءتاسىل بەلگىلەۋ، كەدەيلىك شەگىن وزگەرتۋ، اتاۋلى كومەكتىڭ شارتسىز نىسانىنان الەۋمەتتىك كەلىسىمشارت جۇيەسىنە كوشىرۋ كوزدەلەدى.
انا مەن بالانى قولداۋ جونىندەگى شارالار كەشەنىن كۇشەيتۋ ماقساتىندا «التىن القامەن»، «كۇمىس القامەن» ماراپاتتالعان نەمەسە بۇرىن «باتىر انا» اتاعىن العان، I جانە II دارەجەلى «انا داڭقى» وردەندەرىمەن ماراپاتتالعان كوپ بالالى انالارعا ارنالعان ارناۋلى مەملەكەتتىك جاردەماقى كوپ بالالى انالارعا ارنالعان جاردەماقىعا وزگەرتىلەدى. زاڭ جوباسىنا سايكەس، اتالعان وزگەرىستەردىڭ بارلىعى 2018 - جىلعى 1 - قاڭتاردان باستاپ قولدانىسقا ەنگىزىلەدى.
زاڭ جوباسى سەناتتىڭ الداعى ۋاقىتتا وتەتىن جالپى وتىرىسىنا شىعارىلادى.
اۆتور: قانات مامەتقازى ۇلى
