قازاقستانداعى شەتەلدىك ۇيىمدار قازاقستاننىڭ تۋىن ورنالاستىرۋعا مىندەتتەلەدى
بۇل تۋرالى بۇگىن سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ مەملەكەتتىك رامىزدەرى تۋرالى» ق ر كونستيتۋتسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ بارىسىندا ءمالىم بولدى.
زاڭ جوباسى ق ر پرەزيدەنتى ن. نازاربايەۆتىڭ بەس ينستيتۋتسيونالدىق رەفورماسىن، سونداي-اق قازاقستان حالقى اسسامبلەياسىنىڭ ХХІІ سەسسياسىندا جۇكتەگەن تاپسىرمالارىن ورىنداۋ ماقساتىندا ازىرلەنگەن.
اتاپ ايتقاندا، زاڭ جوباسى «100 ناقتى قادام» ۇلت جوسپارىن ىسكە اسىرۋعا باعىتتالىپ، وندا مەملەكەتتىك تۋدى پايدالانۋ تاجىريبەسىن كەڭەيتۋ، مەملەكەتتىك رامىزدەردى پايدالانۋ جانە ناسيحاتتاۋ بويىنشا جاڭا ءتيىمدى ادىستەر ەنگىزۋدى قاراستىرادى. ۇكىمەتتىڭ وسى ماسەلە بويىنشا قۇزىرەتى ناقتىلانادى.
«زاڭ جوباسىندا مەملەكەتتىك رامىزدەردى پاتريوتتىق تاربيلەۋ جۇيەسىنىڭ ماڭىزدى ەلەمەنتى رەتىندە زاڭدى جانە جەكە تۇلعالاردىڭ پايدالانۋ پراكتيكاسىن ناقتى رەگلامەنتتەيتىن ءارى كەڭەيتەتىن وزگەرىستەر مەن تولىقتىرۋلار ەنگىزىلدى. مۇندا مەملەكەتتىك رامىزدەردى قولدانۋ ءتارتىبىن كەڭەيتۋ، ناسيحاتتاۋ جانە ولاردى قولدانۋ جونىندەگى ۇكىمەتتىك جانە وكىلەتتى ورگاننىڭ قۇزىرىن ناقتىلاۋ، قازاقستان رەسپۋبليكاسىنىڭ مەملەكەتتىك رامىزدەرى كۇنىن اتاپ ءوتۋدىڭ ەرەجەسىن ازىرلەۋ، مەملەكەتتىك رامىزدەر جانە گەرالديكالىق بەلگىلەر ماسەلەلەرى جونىندەگى ساراپتامالىق كەڭەس قۇرۋ ماسەلەلەرى قاراستىرىلعان»، - دەيدى ق ر مادەنيەت جانە سپورت ۆيتسە-ءمينيسترى مارات ءازىلحانوۆ.
ونىڭ ايتۋىنشا، زاڭ جوباسىمەن مەملەكەتتىك رامىزدەردى قولدانۋ تاجىريبەسىن كەڭەيتۋ ماقساتىندا مەملەكەتتىك زاڭدى تۇلعالارعا ارنالعان، سونداي- اق ۇلتتىق كومپانيالاردىڭ، حولدينگتەردىڭ جانە جالعىز اكتسيونەر بولىپ تابىلاتىن جاۋاپكەرشىلىگى شەكتەۋلى سەرىكتەستىكتەردىڭ مەملەكەتتىك سيمۆوليكالارعا قاتىستى ەكسپوزيتسياسى ءۇشىن ورىن ءبولۋ قامتىلىپ وتىر.
«بۇدان بولەك، قازاقستان اۋماعىندا قىزمەتىن جۇزەگە اسىراتىن شەتەلدىك ۇيىمداردىڭ تۋلارىن قازاقستاننىڭ مەملەكەتتىك تۋىمەن بىرگە ورنالاستىرۋ نورمالارى دا قاراستىرىلدى»، - دەدى ۆيتسە-مينيستر.
زاڭ جوباسى پالاتانىڭ الداعى وتىرىسىنا شىعارىلادى.
اۆتور: قانات مامەتقازى ۇلى
