شەت ەلدەردە تۇراتىن قازاقستاندىقتار جايلى فيلمدەر تۇسىرىلەدى
بۇل تۋرالى بۇگىن «قازاقپارات» تىلشىسىنە وسى تەلەجوبانىڭ جۇرگىزۋشىسى راۋان يمانعاليەۆ ءمالىم ەتتى.
«سۇيىسپەنشىلىكپەن...» دەپ اتالاتىن رەسپۋبليكالىق تەلەجوبا اياسىندا «الماتى- امستەردام» اۆتوشەرۋى ۇيىمداستىرىلىپ وتىر. وعان قاتىساتىن ءتۇسىرۋشى شىعارماشىلىق توپ ەۋروپانىڭ ءبىرقاتار قالالارىندا بولىپ، جەرگىلىكتى حالىقپەن كەزدەسۋلەر وتكىزەدى. ولارعا قازاقستان جايلى، بيىل ەلىمىزدە بولىپ جاتقان ءىرى مادەني شارالار جانە، ارينە، 2017 -جىلى بولاتىن «ەكسپو-2017» جانە 28- قىسقى ۋنيۆەرسيادا جايلى تولىققاندى مالىمەت بەرىلەدى. ماقساتىمىز - ەلىمىزدى شەت ەلدەرگە تانىتۋ جانە تۋريستەر تارتۋ»، - دەدى ر. يمانعاليەۆ.
سونىمەن قاتار ول، ەۋروپا ەلدەرىندە ءومىر ءسۇرىپ جاتقان جانە بەلگىلى ءبىر سالادا جەتىستىكتەرگە قول جەتكىزگەن قازاقستاندىق ازاماتتار جايلى تانىمدىق فيلمدەر تۇسىرىلەتىندىگىن جەتكىزدى.
«ءبىز بۇل ساپار بارىسىندا تەك قانا قازاقستان جايلى ناسيحات جۇمىستارىن جۇرگىزىپ قانا قويمايمىز. سونىمەن قاتار، سول ەلدەردە ءومىر سۇرەتىن جانە قانداي دا ءبىر سالادا جەتىستىكتەرگە قول جەتكىزگەن قازاقستاندىق ازاماتتار جايلى تانىمدىق فيلمدەر تۇسىرەمىز. ماقساتىمىز - ولاردى ەلىمىزگە تانىتۋ. بۇدان باسقا، بولعان قالالارىمىز جايلى جانە جەرگىلىكتى جوعارى وقۋ ورىندارىندا وقيتىن قازاقستاندىق ستۋدەنتتەر جايىندا دا تەلەحابارلار ازىرلەيمىز. تەلەجوبانىڭ جالپى اتاۋى «سۇيىسپەنشىلىكپەن...» دەپ اتالادى. ياعني، بولعان قالالارىمىزعا بايلانىستى ول: «سۇيىسپەنشىلىكپەن... استانادان، ماسكەۋدەن، ۆارشاۆادان، پاريجدەن» بولىپ كەتە بەرەدى»، - دەدى ر. يمانعاليەۆ.
ايتا كەتەلىك، «الماتى- امستەردام» اۆتوشەرۋىنە قاتىسۋشىلار ۇستىمىزدەگى جىلدىڭ 8- قازانىندا الماتىدان دەمەۋشىلەر ۇسىنعان ەكى اۆتوكولىكپەن جولعا شىعادى. ساپار بارىسىندا شىعارماشىلىق توپ استانا، ماسكەۋ، مينسك، برەست، ۆارشاۆا، پراگا، بەرلين، پاريج، امستەردام جانە باسقا دا قالالارىندا بولادى.
35 كۇنگە ارنالعان اۆتوشەرۋ بارىسىندا وعان قاتىسۋشىلار 30 مىڭنان استام شاقىرىمدى باسىپ وتەدى.
اۆتور: جاپپاربەرگەن ايبوتا
