سەنات كوميتەتىندە ءبىرقاتار حالىقارالىق قۇجاتتار تالقىلاندى

وندا دەپۋتاتتار ءبىرقاتار حالىقارالىق قۇجاتتاردى تالقىلادى.

اتاپ ايتقاندا، كوميتەت مۇشەلەرى «قازاقستان رەسپۋبليكاسى مەن ماجارستان اراسىنداعى قىلمىستىق ىستەر بويىنشا ءوزارا قۇقىقتىق كومەك تۋرالى شارتتى راتيفيكاتسيالاۋ تۋرالى» زاڭ جوباسىن تالقىلادى.

شارتقا 2015-جىلدىڭ 1- ساۋىرىندە استانا قالاسىندا قول قويىلعان.

شارت ەرەجەلەرىنە سايكەس، تاراپتاردىڭ سۇراۋ سالۋلارى نەگىزىندە قۇزىرەتتى ادىلەت ورگاندارىنىڭ يۋريسديكتسياسىنا جاتاتىن قىلمىستارعا قاتىستى قىلمىستىق ءىس جۇرگىزۋلەر بويىنشا ءبىر-بىرىنە ءوزارا قۇقىقتىق كومەكتەر كورسەتۋگە مىندەتتەلەدى.

بۇل رەتتە قازاقستان مەن ماجارستان قۇقىقتىق كومەكتەر اياسىندا ادامداردىڭ نەمەسە زاتتاردىڭ ورنالاسقان جەرىن انىقتاۋدى جانە ولاردى سايكەستەندىرۋدى، قىلمىستىق ءىس جۇرگىزۋگە قاتىسى بار قۇجاتتار مەن ماتەريالداردى تابىس ەتۋدى قاراستىرادى. بۇدان بولەك، مەملەكەتتەردىڭ قۇزىرەتتى ورگاندارى ءوزارا جاۋاپ الۋمەن ايعاقتار الۋدى، كۇزەتپەن ۇستالاتىن ادامداردىڭ ايعاقتارىن الۋ نەمەسە باسقا دا پروتسەستىك ارەكەتتەرگە قاتىسۋى ءۇشىن ولاردى ۋاقىتشا بەرۋدى، ءتىنتۋدى جۇزەگە اسىرۋدى، دالەلدەمەلەردى الىپ قويۋدى، اكتيۆتەردى تاركىلەۋدى جۇزەگە اسىرا الادى.

بۇل رەتتە قۇقىقتىق كومەكتەر سۇراۋ سالاتىن تاراپتاردىڭ ۇلتتىق زاڭناماسىنا سايكەس جازالانۋعا جاتاتىن قىلمىستار بويىنشا قوزعالعان ىستەر بويىنشا بەرىلەدى.

بۇدان بولەك، كوميتەت وتىرىسىندا قازاقستان مەن موناكو كنيازدىگى اراسىنداعى ءدال وسىعان ۇقساس قۇقىقتىق كومەك تۋرالى شارت تالقىلاندى. اتالعان قۇجاتتار الداعى ۋاقىتتا وتەتىن سەناتتىڭ جالپى وتىرىسىنا شىعارىلاتىن بولادى.

  اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى