ايدىن ايىمبەتوۆ قىزمەتىن «قازعارىشتا» جالعاستىرادى

بۇل تۋرالى عارىشكەر بۇگىن استانادا وتكەن «پاتريوتتار» فورۋمىندا ءمالىم ەتتى.

«جەرگە قونۋ جەزقازعاننان الىس ەمەس جەردە 12- قىركۇيەك كۇنى ورىن الدى. كەيىن ءبىز عارىشكەرلەردى دايارلاۋ ورتالىعىندا وڭالتۋ شارالارىنان وتتىك. بۇگىن قازاقستان پاتريوتتارى فورۋمىنا قاتىسۋ ءۇشىن كەلىپ وتىرمىن. وڭالتۋ شارالارى 9- قازاندا، عارىشكەرلەردىڭ كەزدەسۋىنەن كەيىن اياقتالادى. سودان سوڭ مەن قازاقستانعا ورالىپ، «قازعارىش» كومپانياسىندا ءوز قىزمەتىمدى جالعاستىرامىن»، - دەپ اتاپ ءوتتى ول.

ايدىن ايىمبەتوۆتىڭ سوزىنە قاراعاندا، عارىشقا ساپاردىڭ تولىق عىلىمي ناتيجەلەرىن قازعارىش اگەنتتىگىنىڭ رەسمي سايتىنان الۋعا بولادى.

فورۋم جايىندا توقتالعان عارىشكەر مۇنداي شارالاردىڭ ماڭىزدى ەكەندىگىن ەرەكشە اتاپ ءوتتى.

«فورۋمدار ارامىزدا قاراپايىم ءومىر ءسۇرىپ جۇرسە دە، كۇندەلىكتى ۇلى ىستەر جاساپ جۇرگەن باتىرلارىمىزدى ۇلىقتاۋعا باعىتتالعان»، - دەيدى ول.

ا. ايىمبەتوۆتىڭ ايتۋىنشا، عارىشقا جاساعان ساپارى ول ءۇشىن قاراپايىم ىستەردىڭ ءبىرى. «ول مەنىڭ جۇمىسىم، ينجەنەر مامانىنا تيەسىلى قىزمەت. ءيا، ۇلكەن فيزيكالىق اۋىرتپالىقتار، ۇلكەن ەڭبەك تالاپ ەتەدى، ءبىراق ءتيىستى جاتتىعۋدان وتسە، كەز كەلگەن قاراپايىم ادام جاساي الاتىن ءىس»، - دەدى عارىشكەر.

«مەن ءوز ەلىم ءۇشىن ءومىرىمدى قيۋعا، بارشا ءومىرىمدى ءوز ەلىمنىڭ دامۋى مەن كوركەيۋىنە بەرۋگە دايارمىن»، - دەپ ءتۇيدى ءسوزىن ا. ايىمبەتوۆ.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى