قىزىلوردادا جاڭادان اشىلعان يپپودرومدا ات بايگەسى ءوتتى - فوتو
شاراعا ايماق باسشىسى قىرىمبەك كوشەربايەۆ قاتىسىپ، وبلىس جۇرتشىلىعىن مەرەكەلەرىمەن قۇتتىقتادى.
وبلىس ورتالىعىندا جاڭادان پايدالانۋعا بەرىلگەن يپپودروم مەملەكەتتىك جەكە-ارىپتەستىك اياسىندا «قاز گەر مۇناي» جاۋاپكەرشىلىگى شەكتەۋلى سەرىكتەستىگىنىڭ قارجىسىنان سالىندى. بارلىق حالىقارالىق تالاپتارعا ساي. مۇندا، ات سپورت تۇرلەرىن ۇيرەتەتىن ۇيىرمەلەر جۇمىس جاسايتىن بولادى. ەندى ايماقتا جوعارى دەڭگەيدەگى جارىستاردى وتكىزىپ، ۇلتتىق سپورتتى ۇلىقتاۋعا مۇمكىندىك بار.
«قازاقتا اتقا بايلانىستى تەڭەۋلەر، اندەر، جىرلار كوپ. بۇل جىلقى جانۋارىن كيەلى ساناعاننىڭ بەلگىسى. رەسپۋبليكالىق جارىستارعا وبلىسىمىزدان قاتىسقان اۋىزدىعىنان جەل ەسكەن، اسىل تۇقىمدى «يمپەراتور»، «قارا قىز» سەكىلدى تۇلپارلار ەل اۋزىندا اڭىز بولىپ ايتىلىپ ءجۇر. بۇگىن پايدالانۋعا بەرىلىپ وتىرعان جاڭا يپپودرومدا سول سايگىلىكتەردىڭ ءىزىن جالعايتىن تۇلپارلار شىعاتىنىنا سەنىمدىمىز. مەرەكە بارشاڭىزعا قۇتتى بولسىن»، - دەدى وبلىس اكىمى ق. كوشەربايەۆ.
كۇنى كەشە وبلىستا ەگىن جيناۋ ناۋقانى اياقتالدى. ديقاندار بيىلعى جىلدى تابىستى اياقتادى. سولاردىڭ اراسىنداعى ۇزدىكتەرى مەرەكە بارىسىندا ماراپاتتالىپ، اۆتوكولىك كىلتتەرى تابىستالدى.
ات بايگەسى ءۇش ءتۇرى بويىنشا ءوتتى. جارىسقا الماتى، شىمكەنت، تاراز جانە قىزىلوردادان 42 سايگىلىك قاتىستى. قۇنان بايگەدە شيەلىلىك ماحانبەت مايلىبايدىڭ «رەانا» اتتى جىلقىسى توپ جاردى. شاباندوزى مەدەت ەسەنتۇر. ال قىزىلوردالىق سابىرحان ەراسىل شاپقان «دارابوز» اتتى سايگىلىك توق بايگەدە شاشاسىنا شاق جۇقتىرمادى. اتتىڭ يەسى - باقتيار بەكەجانوۆ. 25 شاقىرىمعا سوزىلعان الامان بايگە جارىس كوركىن قىزدىردى. كورەرمەندەردىڭ قيقۋى، سايگىلىكتەرگە شابىت بەردى. بۇل سىندادا قىزىلوردالىق «ايتورى» ەسىمدى جىلقى جەڭىمپاز اتاندى. شاباندوزى ەربولات دوسجانوۆ، ات يەسى - تالعات كيىكبايەۆ. جەڭىمپازدار مەن جۇلدەگەرلەر اقشالاي سىيلىقتارمەن جانە ارنايى ديپلومدارمەن ماراپاتتالدى.
اۆتور: ەلۋباي اۋەزوۆ
