قازاقستاندا وتكەن ايداعى ازىق- تۇلىك تاۋارلارىنىڭ باعا وزگەرىسى
اتاپ ايتقاندا، ەسەپتى كەزەڭدە باعا ازىق- تۇلىك تاۋارلارىنا وتكەن ايدا 0,6 پايىز، اقىلى قىزمەتتەرگە - 0,7 پايىز، ازىق- تۇلىك ەمەس تاۋارلارىنا - 2 پايىزعا وسكەن.
ۇلتتىق ەكونوميكا مينيسترلىگى ستاتيستيكا كوميتەتىنىڭ مالىمەتتەرىنە قاراعاندا، وتكەن ايدا باعانىڭ ءوسۋى بانانعا 15,8 پايىز، قانتقا - 13,4 پايىز، جۇمىرتقاعا - 10,8 پايىز، اپەلسينگە - 6 پايىز، كەپتىرىلگەن جەمىستەر مەن جاڭعاقتارعا - 5,1 پايىز، ليمونعا - 3,5 پايىز، قۇس ەتىنە - 2,8 پايىزدى قۇراعان.
بۇدان بولەك، باعانىڭ بالىق جانە تەڭىز ونىمدەرىنە - 2 پايىز، كوفە، شاي جانە كاكاوعا - 1,7 پايىز، كۇنباعىس مايىنا - 1,6 پايىز، كۇرىشكە - 1,4 پايىز، جەمىس جانە كوكونىس شىرىندارىنا - 1,3 پايىزعا، پاستەرلەنگەن، كونسەرۆىلەنگەن سۇتكە، مايەكتى ىرىمشىككە - 1,1 پايىزدان، ءزايتۇن مايىنا - 0,9 پايىز، شيكى سۇتكە - 0,8 پايىز، جارمالارعا - 0,7 پايىزعا، توقاش جانە ۇننان دايىندالاتىن ونىمدەرگە، قىشقىل ءسۇت ونىمدەرىنە، سۇزبەگە، كونديتەرلىك ونىمدەرگە - 0,6 پايىزدان وسكەنى بەلگىلەندى.
سونىمەن ءبىر مەزگىلدە باعانىڭ تومەندەۋى جاڭا جينالعان كوكونىستەرگە 10,9 پايىز، كارتوپقا - 8,9 پايىز، جۇزىمگە - 7 پايىز، المۇرتقا - 3,4 پايىز، الماعا - 1,6 پايىزعا تىركەلىپ وتىر.
بۇدان بولەك، اۆتوموبيلدەر 3,7 پايىزعا، فارماتسيەۆتيكالىق ونىمدەر - 2 پايىزعا، جيھاز جانە ۇيگە قاجەتتى زاتتارى - 1,8 پايىزعا، كيىم جانە اياق كيىم، جۋعىش جانە تازالاعىش قۇرالدارعا، كەڭسە تاۋارلارى مەن سىزۋ قۇرالدارىنا - 1 پايىزدان قىمباتتاعان. بەنزين 13,2 پايىزعا، ديزەل وتىنى - 1,1 پايىزعا قىمباتتادى.
«سونىمەن قاتار، باعا دەڭگەيى ءبىلىم بەرۋ قىزمەتتەرىنە 2,3 پايىز، كەشەندى دەمالىستاردى ۇيىمداستىرۋ - 1,6 پايىزعا، قوناق ۇيلەر، ويىن- ساۋىق جانە مادەنيەت سالاسىنداعى - 0,5 پايىزعا وسسە، الىس قاشىقتىققا قاتىنايتىن جولاۋشىلاردىڭ تەمىر جول كولىگىمەن جول ءجۇرۋ اقىسى %8,6 عا قىمباتتاپ، اۋە كولىگىمەن قاتىناۋ كەرىسىنشە 4,4 پايىزعا ارزانداعان. تۇرعىن ءۇي- كوممۋنالدى قىزمەتتەر سالاسىندا تاريفتەر تاراتۋ جەلىلەرى بويىنشا تاسىمالداناتىن گازعا باعا 3,4 پايىز، سۋىق سۋعا - 2,2 پايىز، تۇرعىن ءۇيدى كۇتىپ ۇستاۋعا - 0,6 پايىز، ەلەكتر ەنەرگياسىنا - 0,4 پايىزعا، قوقىس شىعارۋ، كارىزگە - 0,3 پايىزدان جوعارىلادى»، - دەلىنگەن باسپا ءسوز بايانىندا.
اۆتور: قانات مامەتقازى ۇلى
