استانادا سيريا داعدارىسىمەن كۇرەس جونىندەگى قورىتىندى دەكلاراتسياعا قول قويىلدى
2 - قازان كۇنى باستالعان كەلىسسوزدەر ناتيجەسىنە وراي، سيرياداعى داعدارىسپەن كۇرەس جونىندەگى كەزدەسۋدى ۇيىمداستىرۋدىڭ ودان ارعى شارالارى قامتىلعان قورىتىندى دەكلاراتسياعا قول قويىلدى.
«استانادا ەكىنشى مارتە باسقوسۋعا مۇمكىندىك ۇسىنعانى ءۇشىن قازاقستان رەسپۋبليكاسى مەن پرەزيدەنت نۇرسۇلتان نازاربايەۆقا ريزاشىلىعىمدى بىلدىرگىم كەلەدى. ءبىرىنشى كونفەرەنسيادا داعدارىسپەن كۇرەس بويىنشا باستامالاردى قامتىعان ءبىرشاما قۇجاتتارعا قول قويىلعان بولاتىن. كەلىسسوزدەردىڭ ەكىنشى راۋندىندا سيرياداعى داعدارىستى شاپشاڭىراق شەشۋ ءۇشىن باستامالار قوسىلىپ وتىر»، - دەيدى سيرياداعى پليۋراليستىك قوعام ءۇشىن قوزعالىسىنىڭ باسشىسى راندا كاسسيس.
ايتا كەتەرلىگى، «استانا-2» كەلىسسوزدەردىڭ ەكىنشى راۋندىنا قاتىسۋشىلار سايلاۋ ۇدەرىسىنە ەرەكشە نازار اۋدارىپ وتىر، بۇل رەتتە سايلاۋعا حالىقتىڭ بارلىعى، ولاردىڭ ەلدە نەمەسە شەت ەلدەردە جۇرگەندەرىنە قاراماستان بارلىعى دا قاتىسۋ مۇمكىندىگىنە يە ەكەندىگىنە ايرىقشا ءمان بەردى.
«سيريادا سوعىس توقتامايىنشا بوسقىندار ماسەلەسى ءالى دە جالعاسا بەرەدى. بوسقىندار اعىنىن توقتاتۋدىڭ جالعىز مۇمكىندىگى - قانتوگىستەردى، سوعىستى توقتاتۋ. سيريالىق قوعامنىڭ باسىم بولىگى ساياسي شەشىم، ادىلدىك ارقىلى عانا وسىنى جۇزەگە اسىرۋعا بولادى دەگەن پىكىردە»، - دەيدى سيريالىق وپپوزيتسيانىڭ تاعى ءبىر وكىلى باسسام ا بيتار.
كەلىسسوزدەردىڭ ەكىنشى راۋندىنا 37 ادام قاتىستى. كونفەرەنتسيا بارىسىندا سيريالىق داعدارىسقا قاتىستى ءتۇرلى ساياسي شەشىمدەر ۇسىنىلعان. «ءبىز تەزىرەك شەشىم تاۋىپ، سيريالىق داعدارىستى بەيبىت جولمەن اياقتاۋعا ءۇمىتتىمىز»، - دەپ تۇيىندەيدى ابدۋللا ابدۋلساييد.
ەسكە سالا كەتەيىك، استانادا 25-27 -مامىر ارالىعىندا سيريالىق داعدارىس بويىنشا سيريا وپپوزيتسياسىنىڭ ءتۇرلى توپتارىنان وكىلدەر اراسىندا كەزدەسۋلەر ءوتىپ، ونىڭ ناتيجەسىندە ساياسي شەشىمدەر جونىندەگى استانا دەكلاراتسياسىنا قول قويىلعان بولاتىن. اتاپ ايتقاندا، قۇجاتتا قاتىسۋشىلاردىڭ باسىم بولىگى بارلىق شەتەلدىك سودىرلاردى ەلدەن شىعارۋعا شاقىرىپ، تەرروريزممەن كۇرەستە بىرلەسكەن مايدان قۇرۋدىڭ قاجەتتىگىن مويىنداعان بولاتىن.
اۆتور: قانات مامەتقازى ۇلى
