قىرعىزستاندا پارلامەنت سايلاۋى باستالدى - فوتو
بىشكەكتەگى №70 مەكتەپ- گيمنازياسىندا №1216 سايلاۋ ۋچاسكەسىنىڭ جۇمىسى اشىلعان. «قازاقپارات» تىلشىسىنە بەرگەن سۇحباتىندا سايلاۋ كوميسسياسىنىڭ ءتورايىمى ناتاليا بەلوۆولوۆا داۋىس بەرۋ پروتسەدۋراسى تۋرالى بايانداپ بەردى.
«ءبىزدىڭ ۋچاسكەمىزدە 1615 سايلاۋشى تىركەلگەن. قازىرگى كەزدە بىزدە 42 بايقاۋشى تىركەلدى. داۋىس بەرۋ تاڭەرتەڭگى ساعات 8 دە باستالدى. ارنايى جاشىكتەر قويىلعان، اۆتوماتتى تۇردە ەسەپتەيتىن قۇرالدار مەن وپەراتورلار جۇمىس ىستەۋدە. بارلىق مالىمەتتەر بىردەن مونيتورلارعا شىعىپ وتىرادى»، - دەپ حابارلادى ن. بەلوۆولوۆا.
داۋىس بەرۋ پروتسەدۋراسىندا داۋىس بەرۋشىنىڭ ساۋساق ىزدەرىن سكانەردەن وتكىزىلىپ، سول ۋاقىتتا ونىڭ فوتوسۋرەتى مونيتورعا شىعارىلىپ، رەتتىك ءنومىرى بەلگىلەنەدى. مەملەكەتتىك تىركەۋ قىزمەتىنىڭ وكىلى بيومەترلىك مالىمەتتەردىڭ نەگىزىندە چەك بەرەدى. ۋچاسكەلىك سايلاۋ كوميسسياسىنىڭ مۇشەلەرى بۇل چەك ارقىلى جەكە مالىمەتتەردى سايلاۋ تىزىمدەرىمەن سالىستىرىپ، داۋىس بەرۋ ءۇشىن ارنايى بيۋللەتەن ۇسىنادى. ودان كەيىن سايلاۋشى داۋىس بەرۋگە ارنالعان ارنايى كابينكاعا بارىپ، سوڭعى كەزەڭدە رەسىمدەلگەن بيۋللەتەندى ارنايى جاشىكتىڭ ەسەپتەۋ قۇرالىنا سالادى.
«ەلەكتروندىق جاشىك بيۋللەتەندەردىڭ سانىن عانا تىركەيدى، ال كەشكە داۋىس بەرۋ اياقتالعان سوڭ كىمنىڭ كىمگە داۋىس بەرگەنى ەسەپتەلەدى. قازىردىڭ وزىندە قانشا ادامنىڭ داۋىس بەرگەنىن كورۋگە بولادى. بۇل ۋچاسكەدە تىركەلۋى بار جانە ءبىزدىڭ تىزىمدەرىمىزگە ەنگىزىلگەن سايلاۋشىلار عانا داۋىس بەرە الادى. بوگدە ادامدار ولاي ىستەي المايدى»، - دەپ سەندىردى كوميسسيانىڭ ءتورايىمى.
