مالايزيادا ەلەكتروندى تەمەكىنىڭ ساتىلىمىنا شەكتەۋ قويىلۋى مۇمكىن

كۇرمەۋى شەشىلمەگەن بۇل ماسەلەگە قاتىستى ەلدىڭ ۇكىمەتتىك ەمەس ۇيىمى دابىل قاعىپ، شىلىمنىڭ بۇل ءتۇرىن قۇپ كورمەيتىندەردىڭ اراسىنان 50000 نان استام قول جيناپ ۇلگەردى. اتالعان ۇيىم باسشىسىنىڭ ايتۋىنشا، ۇكىمەت ەلەكتروندى تەمەكى ءوندىرىسى مەن ساتىلىمىن جۇيەلەندىرۋى كەرەك. ويتكەنى قازىرگى ۋاقىتتا ۇلكەن سۇرانىسقا يە تاۋاردىڭ بۇل ءتۇرى جاستار اراسىندا سانگە اينالىپ بارادى. سونىمەن قاتار كادىمگى تەمەكىگە قاراعاندا ونىڭ الدەقايدا زيان ەكەندىگىن نازاردان تىس قالدىرماۋ قاجەت دەيدى ماماندار.

اتالعان قۇرىلعى نيكوتين مەن جاعىمدى ءيىس بەرەتىن دامدەۋىشتەردىڭ كومەگىمەن بۋ شىعاراتىن ينگالياتور رەتىندە جۇمىس ىستەيدى. سوندىقتان ماماندار پىكىرى ەلەكتروندى تەمەكى جاعىمسىز ادەتتەن ارىلۋعا كومەكتەسپەيدى دەگەنگە سايادى. سوڭعى رەسمي دەرەكتەرگە سۇيەنسەك، نەبارى ءتورت جىلدىڭ ىشىندە مالايزيادا ەلەكتروندى تەمەكىنى شەگەتىندەردىڭ سانى 400000-عا جەتكەن.

ايتا كەتەيىك، بۇدان بىرنەشە جىل بۇرىن گونكونگ، برۋنەي، تايلاند جانە سينگاپۋر، برازيليا ەلدەرى ەلەكتروندى تەمەكىنى ساتۋعا تىيىم سالعان بولاتىن.

اشوك فيليپ، مالايزيا مەديتسينا قاۋىمداستىعىنىڭ پرەزيدەنتى:

- جالپى كوپتەگەن ادام كادىمگى تەمەكىدەن باس تارتىپ، ورنىنا ەلەكتروندى تەمەكىنى شەگىپ جاتادى. مۇنداعىسى -  جامان ادەتتەن قۇتىلۋ. مەنىڭشە، بۇل دۇرىس ەمەس جانە ونىڭ كومەگى شامالى. ويتكەنى ەلەكتروندى تەمەكىنىڭ قۇرامىندا دا كوپ مولشەردە نيكوتين بار. ول كادىمگى تەمەكىدەن دە زيان. دۇرىسى، تەمەكىگە دەگەن تاۋەلدىلىكتەن قۇتىلۋ ءۇشىن ەمحانالارعا بارىپ، ءتيىستى دارىگەرلەردىڭ كومەگىنە جۇگىنگەن ءجون.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى