قازاقستانداعى بالەت ونەرى الەمدىك دەڭگەيگە كوتەرىلدى دەپ ايتا الامىن - ر ف مەملەكەتتىك سىيلىعىن العان تۇڭعىش قازاق ن. قانەتوۆ
بالەت ونەرىندەگى بيشىلەر الەم ساحنالارىنا شىعىپ، ءبي ونەرىندەگى قابىلەتىن تانىتۋ ارقىلى الەم جۇرتىن تاڭقالدىرۋدا. سونداي تالانتتاردىڭ ءبىرى - رەسەي مەملەكەتتىك سىيلىعىنىڭ لاۋرەاتى، تاتارستان رەسپۋبليكاسىنىڭ، رەسەي فەدەراتسياسىنىڭ ەڭبەك سىڭىرگەن ءارتىسى، جەرلەسىمىز نۇرلان قانەتوۆ. جاقىندا قازان قالاسىندا بولعان ساپارىمىزدا وسىنداعى مۇسا جالەل اتىنداعى تاتارستان مەملەكەتتىك وپەرا جانە بالەت تەاترىندا جۇمىس ىستەيتىن جەرلەسىمىزگە ارنايى جولىعىپ، اڭگىمەگە تارتقان ەدىك، دەپ جازادى «الماتى اقشامى» گازەتى.
اتالعان سۇحباتتى ىقشامداپ وقىرمان نازارىنا ۇسىنامىز.
- نۇرلان، جاقىندا عانا رەسەيدىڭ ەڭبەك سىڭىرگەن ءارتىسى اتاعىن الىپسىڭ. سوعان قۇتتى بولسىن ايتا كەلدىك.
- اعا، شىن پەيىلىڭىزگە راحمەت! قىرىق جاسقا تولۋىما بايلانىستى تاتارستان ۇكىمەتى مەن ونەر ۇجىمى شىعارماشىلىق كەشىمدى وتكىزىپ بەردى. وسى كەشتە رەسەيدىڭ ەڭبەك سىڭىرگەن ءارتىسى اتاعىمەن ماراپاتتادى. مەن جان- تانىممەن قازاقپىن، وسى كەشكە ەڭ بولماعاندا جەرگىلىكتى قازاق مادەنيەت ورتالىعىنان نەمەسە قازاقستاننىڭ تاتارستان رەسپۋبليكاسىنداعى باس كونسۋلدىعىنان ءبىر ادامنىڭ قاتىسپاۋى جانىما باتتى.
- نۇرلان، سەنىڭ تاتارستانعا نەلىكتەن كەتىپ قالعانىڭدى تاپتىشتەپ سۇراعىمىز كەلمەيدى. الايدا، ەلدەن جىراقتا وتكىزگەن جىلداردا ىزدەگەنىڭدى تابا الدىڭ با؟
- قازاقستاننان كەتكەنىمە بيىل 19 جىلدان اسىپ بارادى. 1993 -جىلى الماتى حورەوگرافيالىق ۋچيليشەسىنەن كەيىن 3 جىل اباي اتىنداعى وپەرا جانە بالەت تەاترىندا قىزمەت ەتتىم. 1996 -جىلى قازان تەاترىندا قىزمەت ەتەتىن اتاقتى ءبيشى باقىتجان سماعۇلوۆ ءوزى قىزمەت ىستەپ جۇرگەن تەاترىنا شاقىردى. سودان بەرى وسىندامىن. وزگە ەلگە ۇيرەنىسۋ قيىن بولعان جوق. قۇدايعا شۇكىر، جاعدايىم جاقسى، ماتەريالدىق جاعدايىم جامان ەمەس، ونەر ادامىنا لايىق سىي- قۇرمەت تە ءبىر باسىمدا جەتكىلىكتى.
- قازاقستانداعى ارىپتەستەرىڭىز تۋرالى نە ايتاسىز؟
- قازىر قازاقستانداعى بالەت ونەرى الەمدىك دەڭگەيگە كوتەرىلدى دەپ ايتا الامىن. جاس بيشىلەر وزدەرىنىڭ دەڭگەيلەرىنىڭ قانشالىقتى جوعارى ەكەندىكتەرىن وزدەرى بىلمەيدى. سوندىقتان، ولار شەت ەلدەرگە گاسترولدىك ساپارعا شىعىپ، بايقاۋلارعا قاتىسۋلارى كەرەك. ول ءۇشىن كلاسسيكالىق ونەردى تۇسىنەتىن، ءبىلىم- بىلىگى جوعارى مەسەناتتار كوبەيۋى قاجەت.
- تۋعان ەلگە بارىپ تۇراتىن بولارسىڭ؟
- مەن الەمدى كوپ ارالايمىن. جۇرگەن جەرىمدە جەرگىلىكتى حالىقتىڭ بولمىسىنا ۇڭىلەمىن. ولاردى ءوزىمنىڭ تۋعان حالقىممەن سالىستىرامىن. قازاق حالقى - وتە دارىندى حالىق. ال دارىندى حالىقتىڭ گەنەتيكالىق فونى وتە تازا بولىپ كەلەدى. ولاردىڭ بويىندا انتروپولوگيالىق دەڭگەيدە رۋح مادەنيەتى، ار- نامىس ۇعىمى، ەلىن ءسۇيۋ قاسيەتى باسىم بولىپ كەلەدى.
مەن باتىس قازاقستان وبلىسىندا دۇنيەگە كەلدىم. «تۋعان جەر - اركىمنىڭ مىسىر شاھارى» دەيدى عوي. جىلىنا تۋعان ەلگە 2 رەت بارىپ تۇرامىن. باۋىرلارىم كەلىپ تۇرادى.
اڭگىمەلەسكەن - ەرمەك جۇماحمەت ۇلى، قازان قالاسى.
