ءال-فارابي اتىنداعى مەملەكەتتىك سىيلىعىنىڭ لاۋرەاتتارىن ماراپاتتاۋ تاۋەلسىزدىك كۇنى قارساڭىندا وتكىزىلەدى
گۇلشارا ءابدىقالىقوۆا ۇزاقمەرزىمدى «قازاقستان-2050» ستراتەگياسى مەن بەس ينستيتۋتسيونالدىق رەفورمانى ودان ءارى ىسكە اسىرۋ ىسىندە ەكونوميكالىق ءوسۋ مەن ادامي كاپيتالدىڭ دامۋىن قامتاماسىز ەتەتىن ەلدىڭ ماڭىزدى ستراتەگيالىق رەسۋرسى رەتىندە عىلىمنىڭ ءرولى ەرەكشە ەكەنىن اتاپ ءوتتى.
- بۇل رەفورمالار بىلىمگە نەگىزدەلگەن ۇلتتىق ەكونوميكانى قالىپتاستىرۋعا باعىتتالعان. سوندىقتان عىلىمي قىزمەتتىڭ بەدەلىن ارتتىرۋ، سونداي-اق عالىمداردى ۇزدىك عىلىمي زەرتتەۋلەرگە ىنتالاندىرۋ، يننوۆاتسيالاردى ەنگىزۋ ماقساتىندا قازاقستان رەسپۋبليكاسى پرەزيدەنتىنىڭ تاپسىرماسى بويىنشا قازاقستان رەسپۋبليكاسىنىڭ عىلىم مەن تەحنيكا سالاسىنداعى ءال- فارابي اتىنداعى مەملەكەتتىك سىيلىعى تاعايىندالدى، - دەدى مەملەكەتتىك حاتشى.
سىيلىققا ۇمىتكەر رەتىندە ەكونوميكانىڭ ءتۇرلى سالالارىندا جاڭا ءونىم مەن تەحنولوگيالاردى جاساپ شىعارۋ جونىنەن مويىندالعان عىلىمي- تەحنيكالىق، تەحنولوگيالىق جانە يننوۆاتسيالىق قىزمەت ناتيجەلەرى ۇسىنىلدى.
3 -ماۋسىمدا كوميسسيانىڭ العاشقى وتىرىسى ءوتىپ، وندا 26 جۇمىس قارالدى، سونىڭ 9 ى ودان ءارى كونكۋرسقا قاتىسۋ ءۇشىن ۇسىنىلدى.
الدىن الا ىرىكتەۋدەن وتكەن جۇمىستاردىڭ تىزبەسى «ەگەمەن قازاقستان» جانە «كازاحستانسكايا پراۆدا» گازەتتەرىندە جاريالاندى. ەكى اي ىشىندە ولاردى كوپشىلىكپەن تالقىلاۋ جونىندەگى ءىس- شارالار جۇرگىزىلدى.
وتىرىس قورىتىندىسى بويىنشا كوميسسيا ەلباسىعا ۇسىنىلاتىن ۇمىتكەرلەردى انىقتادى.
قازاقستان رەسپۋبليكاسىنىڭ عىلىم مەن تەحنيكا سالاسىنداعى ءال-فارابي اتىنداعى مەملەكەتتىك سىيلىعىنىڭ لاۋرەاتتارىن ماراپاتتاۋ تاۋەلسىزدىك كۇنى قارساڭىندا وتكىزىلەدى.
