تۇرسىنبەك قاباتوۆ جاڭا ازىلكەشتەر جوباسىنىڭ پروديۋسەرى بولادى - فوتو

جوبانىڭ ءاربىر باعدارلاماسىندا كۇلكىلى مونولوگتار، جاقسى اندەر مەن مىڭ بۇرالعان بيشىلەردىڭ ونەرى كورەرمەن نازارىنا ۇسىنىلماق.

«كوڭىلاشار» جوباسىنىڭ ۇيىمداستىرۋشىلارى قازىرگى قوعامنىڭ وزەكتى ماسەلەلەرىن كورەرمەندەرگە ءازىل ارقىلى جەتكىزبەك.

ەلىمىزدىڭ ەڭ ۇزدىك ازىلكەشى تۇرسىنبەك قاباتوۆ باستاعان باعدارلامانىڭ ءبىر توپ قاتىسۋشىلارى جالپى ادامزاتقا ءتان قۇندىلىقتاردى ناسيحاتتايدى.

جوبانىڭ پروديۋسەرى، ءارى جۇرگىزۋشىسى تۇرسىنبەك قاباتوۆ ءوز جوباسى جايىندا: «بۇل باعدارلاما كورەرمەندەرگە ءازىل مەن مىسقىل ارقىلى ماڭىزدى ماسەلەلەر تۋرالى وي سالادى. ەلىمىزدە تانىمال ازىلكەشتەر جوقتىڭ قاسى. ءبىزدىڭ كورەرمەندەر ءۇشىن جاڭا باعىتتاعى ءازىل قاجەت. ساپالى ازىلدەردىڭ از بولۋىنا بايلانىستى، كورەرمەندەرىمىز شەتەلدىك تەلەارنالارعا اۋىسۋدا.

باعدارلامامىزدا قازاقستاننىڭ تۇكپىر-تۇكپىرىنەن حالىق اراسىنان شىققان ۇزدىك ازىلكەشتەردى تاڭدايمىز. ولار بۇل ونەردى تەاتردان مەڭگەرگەن جوق، كاسىبي ءارتىس تە ەمەس. قازاقستاننىڭ بارلىق وڭىرلەرىنە بارىپ، كاستينگقا قاتىسقان ءۇش ءجۇز ادامنىڭ ىشىنەن ءجۇز جيىرما ادامدى ىرىكتەدىك. ىرىكتەۋدەن وتكەن ادامدار «قازاقستان» تەلەارناسىنىڭ ەفيرىندە جەڭىس ءۇشىن باق سىناساتىن بولادى. فينالعا جوبانىڭ ۇزدىك بەس قاتىسۋشىسى شىعادى جانە ولار «ءازىل الەمى» تەاترىنىڭ رەزيدەنتتەرى اتانادى. بۇل باستاماعا «قازاقستان» ر ت ر ك» ا ق باسقارما ءتورايىمى نۇرجان مۇحامەدجانوۆا ۇسىنىس جاساپ، وسىلايشا ءبىز «كوڭىلاشار» اتتى جوبانى جاسادىق»، - دەيدى.

باعدارلامادا بىرنەشە ايدار بولادى، ولار: «اكتەرلىك شەبەرلىك»، «يمپروۆيزاتسيا» جانە ت. ب. «اكتەرلىك شەبەرلىك» ايدارىندا قاتىسۋشىلار وزدەرىنىڭ ارتىستىك شەبەرلىگىن كورسەتسە، «يمپروۆيزاتسيا» ايدارىندا ولار وزدەرىنىڭ جەدەل ويلاۋىن جانە كۇردەلى جاعدايلارداعى تاپقىرلىعىن كورسەتەدى. قاتىسۋشىلاردىڭ ونەرىن كوڭىلدى تاپقىرلار وتاۋىنىڭ (ك ۆ ن) جۇلدىزى - قۇمار لۇقمانوۆ، «دارىن» مەملەكەتتىك سىيلىعىنىڭ لاۋرەاتى، قازاقستان رەسپۋبليكاسىنىڭ حالىق ءارتىسى - سايلاۋ قاميەۆ، سونداي-اق «ءازىل الەمى» تەاترىنىڭ ديرەكتورى جانە ءارتىسى - تۇرسىنبەك قاباتوۆتان قۇرالعان ءادىل- قازىلار القاسى باعالايتىن بولادى.

ەلىمىزدىڭ ەڭ كۇلكىلى ادامدارى كورەرمەندەردىڭ كوزايىمى جانە «كوڭىلاشار» باعدارلاماسىنىڭ جەڭىمپازى اتانۋ ءۇشىن كۇرەسەتىن بولادى. «كوڭىلاشار» باعدارلاماسىن «قازاقستان» تەلەارناسىنىڭ ەفيرىنەن 5 -قازاننان باستاپ دۇيسەنبى- بەيسەنبى ارالىعىندا ساعات 23.35-تە ۇسىنىلادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى