الماتىدا قوناق ۇيلەردىڭ رەيتينگى جاسالدى
«ءبىز بۇل زەرتتەۋ ارقىلى قالادا قانشا ورنالاستىرۋ ورىندارى بار ەكەندىگىن جانە ولاردىڭ دايىندىق دەڭگەيىنىڭ قانداي ەكەندىگىن بىلگىمىز كەلدى. تۋريزم باسقارماسى تاريحىندا تۇڭعىش رەت ۇيىمداستىرىلىپ وتىرعان بۇل جوبا 2017 -جىلى ەلىمىزدە بولاتىن ەكى ءىرى شاراعا باعىشتالىپ وتىر. ولار قىسقى ۋنيۆەرسيادا مەن ەكسپو حالىقارالىق كورمەسى. ەكىنشى شارا استانادا وتەتىن بولسا دا، الماتىعا دا تۋريستەر كەلەدى دەپ وتىرمىز»، - دەدى ءوز سوزىندە الماتى قالالىق تۋريزم باسقارماسى باسشىسىنىڭ مىندەتىن اتقارۋشى ليۋبوۆ بۇرىمبايەۆا.
زەرتتەۋ جۇمىستارىن قازاقستاننىڭ قوناق ۇيلەرى مەن مەيرامحانالارى قاۋىمداستىعى بيىلعى جىلى 15- ماۋسىمنان 15- قىركۇيەك ارالىعىندا جۇرگىزگەن.
«ءبىزدىڭ الدىمىزعا وسى سالاداعى ناقتى جاعدايدى انىقتاۋ مىندەتى قويىلدى. ءسويتىپ، ءبىز جالپى دەرەكتەردى جۇيەلەۋ قۇرالى رەتىندە رەيتينگ جۇيەسىن پايدالاندىق. بۇل جەردە كوزبەن شولۋ جانە «جاسىرىن ساتىپ الۋشى» ادىستەرىن قولداندىق. ياعني، كوميسسيا مۇشەسى ۋاقىتشا تۇرۋشى رەتىندە قوناق ۇيدەن ورىن الادى. رەيتينگتى سەگىز كورسەتكىش بويىنشا جاسالدى. ولاردىڭ ىشىندە ماتەريالدىق- تەحنيكالىق قامتاماسىز ەتۋ، قىزمەت كورسەتۋ نومەنكلاتۋراسى، ءمالىم ەتىلگەن ساناتتى راستايتىن سەرتيفيكاتتىڭ بولۋى جانە باسقا دا رەيتينگتەر بار»، - دەدى قاۋىمداستىق كەڭەسىنىڭ مۇشەسى ناتاليا سەرگەەنكوۆا.
ونىڭ ايتۋىنشا، زەرتتەۋ بويىنشا 165 نىسان قامتىلعان. سولاردىڭ ىشىندە قازىرگى تاڭدا 140 قوناق ءۇي جۇمىس ىستەيدى. ال جەتەۋىندە جوندەۋ جۇمىستارى جۇرگىزىلىپ جاتىر.
«سولاردىڭ ىشىندە 66 قوناق ءۇيدىڭ جۇلدىزدىق دارەجەسى بەلگىلەنبەگەن. ودان باسقا 10 قوناق ءۇيدىڭ باسشىلىعى كوميسسيا مۇشەلەرىن كىرگىزۋدەن ءۇزىلدى- كەسىلدى باس تارتتى. ال كوميسسيا قۇرامىندا قوناق ءۇي بيزنەسىمەن اينالىساتىن ادامدار جوق. ياعني، ادىلدىك بولۋلى ءۇشىن قالا اكىمدىگىنىڭ وكىلدەرى، اۋە جەلىلەرىنىڭ ماماندارى جانە مەيرامحانا سالاسىندا وقيتىن ستۋدەنتتەر ەنگىزىلدى»، - دەدى ن. سەرگەەنكوۆا.
سونىمەن، «حوستەلدەر» اتالىمى بويىنشا Nomad guest house ءۇيى ەڭ جوعارى بالعا يە بولدى. جۇلدىزدىق دارەجەسى جوق قوناق ۇيلەر اراسىندا «الما» قوناق ءۇيى ءبىرىنشى ورىن الدى. «ءتورت جۇلدىزدى قوناق ءۇي» اتالىمى بويىنشا Worldhotel Saltanat، ال بەس جۇلدىزدى جانە ودان جوعارى دارەجە بويىنشا The Ritz-Carlton Almaty قوناق ءۇيى ەڭ جوعارى بالل جينادى.
سونىمەن قاتار، تۋريزم باسقارماسىنىڭ وكىلى مۇنداي زەرتتەۋلەردىڭ قوناق ۇيلەردىڭ جۇمىسىنا وڭ اسەر ەتەتىندىگىن جانە زەرتتەۋ دەرەكتەرى باسپا ءسوز بەتتەرىندە جاريالاناتىندىعىن باسا ايتتى.
اۆتور: جاپپاربەرگەن ايبوتا
