قازاقستانداعى كوشباسشى انيماتسيالىق كينو ستۋديا

ەلىمىزدە العاش رەت تاريحي تاقىرىپتا، ونىڭ ۇستىنە قازاق حاندىعىنىڭ قۇرىلۋى جونىندە جارىق كورگەلى وتىرعان ۇلكەن جوبانىڭ جۇمىس بارىسى، جاي- جاپسارى جونىندە شىمكەنتتەگى كينوستۋدياعا بارامىز دەپ جوسپارلاپ جۇرگەندە، اتالمىش وقيعاعا وراي ىزدەگەن ادامدارىمىز الماتىدان تابىلدى.

ايتقانداي، بيىل مامىردا وڭتۇستىك قازاقستاندىق «ساق» كينوستۋدياسى تۇسىرگەن «قوشقار مەن تەكە» مۋلتفيلمى قىتايدىڭ حاڭجۋ قالاسىندا وتكەن ءدۇبىرلى انيماتسيالىق فيلمدەر فەستيۆالىنەن «وتانسۇيگىشتىككە تاربيەلەۋ» جانە «ۇلتتىق ەرەكشەلىك» دەگەن ەكى بىردەي نوميناتسيانى يەمدەنىپ قايتقانىن قۋانا حابارلاعان بولاتىنبىز. سول اۋقىمدى فەستيۆالگە 45 ەلدەن 800 دەن اسا ستۋديا قاتىسقان بولاتىن.

سونىمەن، بىزدەر اتالمىش مۋلتفيلمنىڭ تانىستىرىلىمىنا وراي، الماتىدا وتكەن باسپا ءسوز ءماسليحاتىنان كەيىن «ساق» كينوستۋدياسىنىڭ ديرەكتورى نۇريددين پاتتەيەۆپەن جانە رەجيسسەر باتىرحان داۋرەنبەكوۆپەن تىلدەسكەن ەدىك. «ساق» كينوستۋدياسى قولعا العان وسىناۋ ماڭىزدى جۇمىسىنىڭ باياندى بولۋىن تىلەپ، بىردەن جاڭا مۋلتفيلمنىڭ جاي- جاپسارىنا كوشتىك.

- ءبىزدىڭ كينوستۋديا 2011 - جىلى قۇرىلدى. 4 جىل بويى انيماتسيا سالاسىندا جەمىستى ەڭبەك ەتىپ قانا قويماي، قازاق انيماتسياسىنىڭ جاڭا دەڭگەيگە كوتەرىلۋىنە سۇبەلى ۇلەس قوسىپ ءجۇر دەپ سەنىممەن ايتا الامىز. كىشكەنتاي كورەرمەندەردى عانا ەمەس، تالعامپاز ەلدىڭ تالعامىنان شىققان «قوشقار مەن تەكە»، «مومىن مەن قاراقشىلار»، «تولاعاي»، «قازاقتىڭ برەندى»، «ساپا وليمپياداسى» سىندى مۋلتفيلمدەردى دۇنيەگە اكەلىپ، جۇرتشىلىقتى قۋانتۋدامىز.

 سوڭعى جىلدارى بەلورۋسسيا، رەسەي، فرانسيا، قىتاي ەلدەرىندە وتكەن فەستيۆالدەرگە قاتىسىپ، حالىقارالىق جۇلدەلەرگە دە يە بولدىق. قازىرگى تاڭدا «ساق» ۇجىمىنىڭ قازاقستانداعى كوشباسشى انيماتسيالىق ستۋديا ەكەنىنىڭ تاعى ءبىر دالەلى - مەملەكەتتىڭ قازاق حاندىعىنىڭ 550 جىلدىعىنا ارنالعان جوبانى بىزگە سەنىپ تاپسىرعانى. بۇل ءبىز ءۇشىن ۇلكەن جاۋاپكەرشىلىك، ءارى ۇلكەن ماقتانىش، - دەيدى نۇريددين پاتتەيەۆ.

سونىمەن، «ساق» كينوستۋدياسى جوبانى قولعا العان كۇننەن باستاپ، كورەرمەندەردىڭ جاس ەرەكشەلىگىن ەسكەرە وتىرىپ، بالالاردى ەلجاندىلىققا، پاتريوتيزگە باۋلۋدى كوزدەپ وتىرعان جايى بار. فيلمنىڭ بۇكىل سيۋجەتى دە وسى باعىتقا ساي ءوربيدى. انيماتورلار سوڭعى عاسىرلارداعى قازاق حالقىنىڭ ونەرىن، عىلىمىن، مادەنيەتىن، جالپى تۇرمىس- تىرشىلىگىن بارىنشا قامتۋعا تىرىسىپ جاتقانىن ايتادى.

«قازاق ەلى» مۋلتفيلمىنىڭ تاعى ءبىر ەرەكشەلىگى - جاسالۋ ءادىسى. بۇل جوبادا 2D مەن 3D ادىستەرى ۇيلەستىرىلگەن. مۇنى قازاق انيماتسياسى سالاسىنداعى العاشقى قادام دەۋگە بولادى. مۋلتفيلم جاساۋدىڭ مۇنداي ءادىسىن «قازاق ەلى» سەكىلدى ۇلكەن جوباعا پايدالانۋ ۇلكەن جەتىستىك دەپ ەسەپتەيدى جوبا اۆتورلارى.

- جالپى، تولىق مەتراجدى انيماتسيالىق تۋىندىلار ءبىزدىڭ ەلىمىزدە جوقتىڭ قاسى. بۇل جوبا - العاشقى قارلىعاشتار قاتارىندا. سوندىقتان، «قازاق ەلى» تولىق مەتراجدى انيماتسيالىق فيلمىنىڭ يدەولوگيالىق جاعىنان ەل الدىنداعى ارقالار جۇگى اۋىر بولماق. نەگىزى مۇنداي شىعارمالار بىزگە كوپتەپ كەرەك ەكەنىن زامان تالابى كورسەتىپ وتىر، - دەيدى رەجيسسەر باتىرحان داۋرەنبەكوۆ.

ايناش ەسالي

«ەگەمەن قازاقستان»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى